सभ्य, सुरक्षित र संयमित भएर होली मनाउन आग्रह

चितवन / सभ्य, सुरक्षित र संयमित भएर होली पर्व मनाउन जिल्ला प्रहरी कार्यालय चितवनले आग्रह गरेको छ । भोलि (सोमबार) फागुन २२ गते पहाडी भेग र फागुन २३ गते तराई हुने होली पर्वलाई लक्षित गर्दै कार्यालयले आग्रह गरेको हो ।
होलीको समयमा हुने संभावित घटना र दुर्घटना हुन नदिन आग्रह गरिएको चितवन प्रहरी प्रमुख रामेश्वर कार्कीले बताए । होलीको नाममा कुनै अप्रिय र उश्रृंङ्खला गतिविधि हुन नदिन प्रहरीले विशेष सुरक्षा व्यवस्था मिलाएको उनको भनाइ छ ।
कसैको इच्छा विपरित रङ, लोला, मोबिल, मोसो, अण्डा, केमिकल र फोहोर पानी नछ्याप्न र त्यस्ता गतिविधि गरिएको पाइएमा कानुन अनुसार कारवाही हुने उनले बताए ।
यस्तै, महंगा गरगहना लगाएर होली नखेल्न, अपरिचित मानिसले दिएको खानेकुरा नखान, मादक पदार्थ सेवन नगरी सवारी नचलाउन र ट्राफिक नियमको पूर्ण पालना गर्न अनुरोध गरिएको छ । चितवन जिल्ला मध्य तराईका कारण दुबै दिन होली मनाउँदै आएको पाइन्छ ।
अशक्त, महिला, बालबालिका, ज्येष्ठ नागरिक र पर्यटकलाई कुनै किसिमको दुव्र्यवहार नगर्न, रेलिङ नभएको घरको छत र सडकमा होली नखेल्न र भिडभाड हुने स्थानमा पकेटमार तथा लुटपाटका घटनाका सम्भावना हुने भएकाले सावधानी अपनाउन चितवन प्रहरीले आग्रह गरेको छ ।
होली पर्वको नाममा कसैले गैरकानुनी कार्य गरेको पाएमा प्रहरीको नियन्त्रण कक्ष नम्बर १००, ट्राफिक प्रहरी नियन्त्रण कक्ष नम्बर १०३ र जिल्ला प्रहरी कार्यालय चितवनको नम्बर ०५६–५९४८५५, ९८५५०९०१३३ मा खबर गर्न समेत प्रहरीले अनुरोध गरेको छ ।