बुलिङटारको स्वास्थ्य शिविरमा ४२० लाभान्वित

नवलपुर / स्वास्थ्य सेवाबाट वञ्चित गाउँपालिका वडा नं. ३ को विभिन्न ठाउँका ४२० जनाले स्वास्थ्य लिएका छन् । वडा नं. ३ अन्तर्गत भलायटार, गैरी, खसुवाटार माथिल्लो र तल्लो सिंगुवा, धारापानी, नयाँ गाउँमा दुई दिन (शुक्रबार र शनिबार) उक्त शिविर गरिएको हो । गंंगा स्वास्थ्य दर्पण फाउण्डेसन नेपाल र बुलिङटार गाउँपालिकाले संंयुक्त रुपमा शिविर आयोजना गरेको हो ।
शिविरमा वरिष्ठ अर्थोपेडिक सर्जन डा. शंकर ढकाल, वरिष्ठ कलेजो रोग विशेषज्ञ डा. रुपेश श्रेष्ठ, डा. अमित श्रेष्ठ लगायतको टिमले स्वास्थ्य परीक्षण गरेको गाउँपालिकाका स्वास्थ्य शाखा प्रमुख अशोककुमार श्रेष्ठले जानकारी दिए । शिविरमा हाड्जोर्नी, नशा रोग, कलेजो रोग, पेट रोग, उच्च रक्तचाप र मधुमेह रोगसम्बन्धी स्वास्थ्य परीक्षण साथै सचेतनामुलक कार्यक्रम गरिएको थियो ।
हड्डी खिईएको विरामी, नशा च्यापिएको, हड्डीको संक्रमण, प्यारालाइसिस, कलेजो रोग, पेट रोग, उच्च रक्तचाप, दम रोग, मधुमेह रोगबाट प्रभावित विरामीहरु बढी भएको चिकित्सकहरुले जनाएको छ । शिविरमा उपचारका लागि आएका विरामीलाई अतिरिक्त उपचारका लागि अस्पताल रिफर गरिएको छ ।
विरामीहरुका लागि गुणस्तरीय सेवा र विशेष छुट प्रदान गर्ने हस्पिटलका अध्यक्ष तथा वरिष्ठ अर्थोपेडिक सर्जन डा. शंकर ढकालले बताए । चिकित्सकले सकेसम्म रोग लाग्नै नदिनतर्फ ध्यान दिनु पर्ने सुझाव दिएका थिए ।
यसैगरी पालिकाका प्रमुख प्रशासकीय अधिकृत विशाल मिश्रा, वडा नं. ३ का अध्यक्ष विष्णु विर जर्घामगर, स्वास्थ्य शाखा प्रमुख अशोककुमार श्रेष्ठ लगायतले मन्तव्य दिएका थिए ।
आगामी दिनमा शिविरलाई निरन्तरता दिँदै लगिने फाउण्डेसनका अध्यक्ष सन्दिपकुमार श्रेष्ठले बताए । शिविरको प्राविधिक सहयोग भरतपुरमा रहेको मनकामना हस्पिटल प्रालिले र स्थानीय संयोजन बुलिङटार जेसीजले गरेको हो ।