मेयर लामाद्वारा आँखा उपचार केन्द्रको अनुगमन, परीक्षणका लागि आग्रह

–बबिलाल तामाङ
राप्ती । राप्ती नगरपालिकाका नगरप्रमुख शमशेर लामाले भण्डारा अस्पताल परिसरमा रहेको आँखा उपचार केन्द्रको अनुगमन गरेका छन् । राप्ती नगरपालिकाका जनसमुदायलाई लक्षित गरी स्थापना गरिएको आँखा उपचार केन्द्रमा नगरप्रमुख लामाले आइतबार अनुगमन गरेका हुन् ।
अनुगमनका क्रममा नगर प्रमुख लामाले सम्पूर्ण नगरवासीलाई आँखाको जाँच गर्नका लागि आँखा उपचार केन्द्रमा आउन आग्रह गरे । पछिल्लो समय मोवाइल, कम्प्युटर तथा विद्युतिय सामानमा धेरै समय बिताउने भएकाले त्यसको प्रत्यक्ष असर आँखामा पर्ने उनको भनाइ थियो ।
मानिसको आँखा सबैभन्दा संवेदनशील अंग भएकाले त्यसको सुरक्षा गर्नु आवश्यक रहेको बताउँदै बेलाबेलामा परीक्षण गर्नुपर्ने उनले जिकिर गरे । उक्त केन्द्रमा नियमित उपचारको लागि सेवाग्राही बढ्दो क्रम रहेकोमा खुशी व्यक्त गरे ।
उनले आँखाको परीक्षणसहित अप्रेशनसम्म गर्नुपर्ने भएमा संख्याको आधारमा भण्डारामा नै व्यवस्था भएको जानकारी दिए । पाँच जनाभन्दा बढी विरामी भएमा आवश्यक प्रविधिसहित आँखा अस्पताल व्यवस्थापन टोलीले भण्डारामा आई उपचार गरीदिने प्रतिवद्धता जाहेर गरेको बताए ।
केन्द्रमा १७ जनासम्म आँखाका विरामी आउने र बिस्तारै गति लिँदै गरेको बताइएको छ । अहिले नियमित ६ जना भन्दा बढी आउने गरेको छ । आँखा परीक्षण केन्द्र भण्डारामै स्थापना भएसँगै नगरवासीहरु शहर केन्द्रित ठूलो अस्पतालमा धाउनु पर्ने बाध्यता हटेको छ ।