चितवनका तामाङ समुदाय बुद्ध जयन्ती मनाउने तयारीमा

–बबिलाल तामाङ
भरतपुर । चितवनका तामाङ समुदायले बुद्ध जयन्ती मनाउने तयारी गरेका छन् । हरेक वर्ष चण्डीपूर्णिमाका दिन बुद्ध जयन्ती मनाउने गरिन्छ । सोहीअनुसार यसवर्ष पनि धुमधामका साथ बुद्ध जयन्ती मनाउने तयारी गरिएको हो । यसवर्षको बुद्ध जयन्ती यही बैशाख २२ गते परेको छ । उक्त दिन बौद्धमार्गीहरूले विशेष तरिकाले बुद्ध जयन्ती मनाउँदै आएका छन् ।
नेपाल तामाङ घेदुङ जिल्ला समन्वय समिति चितवनका अध्यक्ष बाबुलाल थिङका अनुसार यसपटकको बुद्ध जयन्ती सबैले आफूलाई पायक पर्ने गुम्बाहरूमा भेला भई मनाउन आग्रह गरिएको छ । केन्द्रबाट केही जानकारी नआएकाले यसपटक आफूअनुकूल बुद्ध जयन्ती मनाउन सबै इकाइ तथा तामाङ समुदायमा आग्रह गरिएको उनको भनाइ छ । घेदुङ तामाङ समुदायको छाता संगठन हो । घेदुङले तामाङ समुदायको हक अधिकार र मुद्दाका लागि लड्दै आएको छ ।
यसैबीच भरतपुर नगर तामाङ समाजकी अध्यक्ष पासाङ तमाङले भरतपुर–११ भोजाडस्थित छेच्यू थर्पलिङ गुम्बामा बुद्ध जयन्ती मनाउने तयारी गरेको बताइन् । बुद्ध जयन्तीको पूर्वसन्ध्यामा गुम्बा परिषरमा सरसफाइसमेत गरिएको छ । गुम्बामा आउने भक्तजनहरूलाई प्रसादस्वरूप नास्ता तथा खीरको व्यवस्था गरिने उनले बताइन् । तामाङ समुदायलगायत सम्पूर्णलाई उक्त दिन गुम्बामा आउनसमेत उनले आग्रह गरेकी छन् । छेच्यू थर्पलिङ गुम्बामा समाजले वर्षेनि विभिन्न कार्यक्रम गर्दै आइरहेको छ ।
यसैगरी भरतपुर–११, लामाटोलमा रहेको विश्व पञ्चशील शान्ति बौद्ध गुम्बामा पनि बुद्ध जयन्ती मनाउने तयारी गरिएको गुम्बाकी अध्यक्ष शिवकुमारी लामाले जानकारी दिइन् । लामाटोलको आमा समूहद्वारा निर्माण गरिएको उक्त गुम्बामा हरेक वर्ष बुद्ध जयन्तीमा पूजापाठ, बुद्ध प्रवचन हुने गर्दछ ।
यसपटक पनि सोहीअनुसार तयारी गरिएको उनले बताइन् । उनका अनुसार गुम्बामा बैशाख २१ गते बिहीबार र २२ गते शुक्रबार लामा पाठ (प्रवचन) गराउने कार्यक्रम छ ।
बौद्ध धर्मावलम्बी तथा भक्तजनहरूलाई बुद्ध जयन्तीको दिन गुम्बामा सहभागी भइदिन पनि उनले आग्रह गरेकी छिन् ।
गुम्बाले तामाङ समुदायसँग सम्बन्धित विभिन्न खालका चाडपर्वलाई उच्च प्राथमिकताका साथ मनाउँदै आएको छ ।