काठमाडौं / अन्तर्राष्ट्रिय महिला च्याम्पियनसिपको उपाधि म्यानमारले चुमेको छ । दशरथ रंगशालामा बुधबार सम्पन्न भएको उक्त प्रतियोगितामा घरेलु टोली नेपाललाई उपविजेता बनाउँदै म्यानमारले उपाधि जितेको हो ।
खेलमा घरेलु टोली नेपालले फिफा वरीयतामा आफूभन्दा ४८ स्थानमाथिको म्यानमारसँग २–० गोल अन्तरले उपविजेता बन्यो ।
नेपाली महिला टिम हालसम्म १३औं पटक उपविजेतामा सीमित भएको छ । नेपालले सन् २०१० यता १५ वर्षमा १३ फाइनल खेले पनि हालसम्म कुनै पनि उपाधि जित्न सकेको छैन । बुधबार त्रिपुरेश्वरस्थित दशरथ रंगशालामा १५ हजार ५६८ दर्शकमाझ सम्पन्न खेलमा दुवै गोल म्यानमारले दोस्रो हाफमा गरेको हो ।
- ADVERTISEMENT -
खेलको पहिलो हाफ गोलरहित बराबरीमा सकिए पनि दोस्रो हाफको दुई मिनेटको अन्तरमा दुई गोल खाएको थियो । खेलको ६२ मिनेटमा म्यानमारले अग्रता लिएको थियो । नो पो खिनले गोल गर्दै घरेलु दर्शकलाई स्तब्ध पारिन् । उनले डिबक्स नजिकबाट बल कुदाएर दोस्रो ब्यार च्याप्दै बललाई जाली चुमाउँदा नेपाल दर्शक शान्त हुन बाध्य भए ।
दुई मिनेटपछि म्यानमारले दोश्रो गोल गरेर अग्रता दोब्बर पार्यो । म्यानमारकी कप्तान विन तुनले डिबक्स नजिकबाट हानेको प्रहार नेपालकी गोलकिपर एन्जिला तुम्बापो सुब्बाको खुट्टामा लागेर गोल भयो । नेपालकी डिफेन्डर गीता रानाले एन्जिलाको खुट्टाबाट फुत्किएको बल रोक्ने प्रयास गरे पनि सफल हुन सकिनन् ।
त्यसअघि खेलको १० औं मिनेटमा एन्जिलाले यन वादीको प्रहार विफल पारिन् । २४ मिनेटमा नेपालकी डिफेन्डर विमला विकले गोललाइनबाट बल क्लियर गर्दै नेपालको संकट टारिन् । त्यसअघि म्यानमारकी सान्थ्वाले डिबक्स भित्रबाट सशक्त प्रहार गरेकी थिइन् ।
खेलको ३५ मिनेटमा नेपालले गोल गर्ने सुन्दर मौका खेर फाल्यो । रेखा पौडेलको पासमा सावित्रा भण्डारीले हानेको प्रहार म्यानमारको गोलकिपरले फर्काइन् । रिबाउन्डमा रेखा पौडेल पनि सफल हुन सकिनन् । फेरि सो बल डिबक्समा क्लियर हुन नसके पनि नेपाल फिनिसिङमा चुक्यो ।
