काठमाडौं / काठमाडौँमा व्यावसायिक भिसाको दुरुपयोग गरी ‘म्यारिज ब्युरो’ सञ्चालन गरिरहेको आरोपमा चारजना चिनियाँ नागरिकलाई अध्यागमन विभागले पक्राउ गरेको छ । सोह्रखुट्टेस्थित मिलीजुली चोकबाट नियन्त्रणमा लिइएका उनीहरूले आर्थिक अवस्था कमजोर भएका नेपाली युवतीहरूलाई चिनियाँ पुरुषहरूसँग विवाह गराउने धन्दा चलाएको विभागले जनाएको छ ।
अध्यागमन विभागका निर्देशक टीकाराम ढकालका अनुसार, पक्राउ पर्नेमा एक महिला र तीन पुरुष रहेका छन् । व्यावसायिक भिसामा नेपाल बसेका उनीहरूले आफूहरूको वास्तविक व्यवसायबारे स्पष्ट जानकारी दिन नसकेको बताइएको छ ।
- ADVERTISEMENT -
प्रारम्भिक अनुसन्धानबाट खुल्न आएअनुसार, यो गिरोहले नेपाली युवतीहरूलाई टिकटक भिडियो बनाउन लगाएर त्यसैमार्फत अन्य चिनियाँ नागरिकहरूसँग सम्पर्क स्थापित गराउने र विवाहको प्रलोभन देखाउने गरेको थियो । निर्देशक ढकालले केही युवतीहरूलाई विवाह गर्ने बहानामा चीन पठाइसकेको पनि अनुसन्धानबाट खुलेको जानकारी दिए ।
पक्राउ परेकामध्ये दुईजना विगत १० वर्षदेखि पर्यटक, अध्ययन र व्यावसायिक भिसामा नेपालमा बस्दै आएका थिए। गैरकानुनी रूपमा नेपालमा बसोबास गर्ने विदेशी नागरिकलाई ५० हजार रुपैयाँसम्म जरिवाना र देश निकाला गर्न सकिने कानुनी प्रावधान छ । अध्यागमन विभागले यस घटनालाई गम्भीर रूपमा लिई थप अनुसन्धान गरिरहेको छ ।
