काठमाडौं / नेपाली क्रिकेटको इतिहासमा कोशेढुंगा मानिएको ‘आईसीसी महिलाटी–२० विश्वकप ग्लोबल छनोट’ आज (आइतबार)देखि काठमाडौंमा सुरु हुँदैछ । नेपालले आयोजना गर्न लागेको यो अहिलेसम्मकै सबैभन्दा ठूलो र प्रतिष्ठित अन्तर्राष्ट्रिय प्रतियोगिता हो ।
घरेलु मैदानमा इतिहास रच्ने लक्ष्यसहित नेपालले आज आफ्नो पहिलो खेलमा बलियो प्रतिद्वन्द्वी थाइल्यान्डको सामना गर्दैछ । कीर्तिपुरस्थित त्रिवि क्रिकेट मैदानमा हुने यो खेल दिउँसो सुरु हुनेछ । नेपाली महिला टोलीले पहिलो पटक विश्वकपको ग्लोबल छनोट खेल्न लागेको हो । गत मे महिनामा थाइल्यान्डमा सम्पन्न एसिया क्षेत्रीय छनोटको सेमिफाइनलमा यूएईलाई हराउँदै नेपालले यो ऐतिहासिक यात्रा तय गरेको थियो ।
- ADVERTISEMENT -
प्रतियोगितामा नेपालसहित कुल १० राष्ट्र सहभागी छन् । जसमा नेपाल, बंगलादेश, जिम्बावे, आयरल्यान्ड, स्कटल्यान्ड, थाइल्यान्ड, नेदरल्यान्ड्स, पपुवा न्युगिनी, नामिबिया र अमेरिका रहेका छन् । बंगलादेश, जिम्बावे र आयरल्यान्ड जस्ता टेस्ट मान्यताप्राप्त राष्ट्रका पूर्ण टोली पहिलो पटक नेपाली भूमिमा प्रतिस्पर्धा गर्न आइपुगेका हुन् ।
सहभागी १० टोलीलाई दुई समूहमा विभाजन गरिएको छ । नेपाल समूह ‘बी’ मा छ, जहाँ थाइल्यान्ड, नेदरल्यान्ड्स, जिम्बावे र स्कटल्यान्ड रहेका छन् । समूह ‘ए’ मा बंगलादेश, आयरल्यान्ड, नामिबिया, पपुवा न्युगिनी र अमेरिका छन् । प्रत्येक समूहबाट शीर्ष ३ टोली ‘सुपर सिक्स’ चरणमा प्रवेश गर्नेछन् । सुपर सिक्सको समाप्तिपछि शीर्ष चारमा रहने टोलीले सन् २०२६ को जुन(जुलाईमा इंग्ल्यान्ड र वेल्समा हुने ट्वान्टी(२० विश्वकपमा स्थान सुरक्षित गर्नेछन् ।
नेपालका लागि पहिलो खेल नै अग्निपरीक्षा साबित हुन सक्छ । सन् २०११ पछि नेपालले थाइल्यान्डलाई पराजित गर्न सकेको छैन । थाइल्यान्डको टोली सन् २०२० को विश्वकप खेलिसकेको अनुभवी टोली हो । नेपालका मुख्य प्रशिक्षक हर्शल पाठक यसअघि थाइल्यान्डकै प्रशिक्षक रहेकाले उनको रणनीति नेपालका लागि ‘मास्टरकार्ड’ बन्न सक्ने अपेक्षा गरिएको छ ।
कप्तान इन्दु बर्माले शनिबार आयोजित पत्रकार सम्मेलनमा भनिन्, ‘हामीले यहाँसम्म आइपुग्न निकै मिहिनेत गरेका छौं । ठूला राष्ट्रसँग खेल्न पाउनु हाम्रा लागि गर्वको विषय हो । हामी मैदानमा आफ्नो उत्कृष्ट खेल पस्कनेछौं ।’
नेपालका सबै खेल कीर्तिपुर मैदानमा हुनेछन् । नेपालले २२ जनवरीमा नेदरल्यान्ड्स, २४ जनवरीमा जिम्बावे र २६ जनवरीमा स्कटल्यान्डसँग खेल्ने तालिका छ । जिम्बावे र स्कटल्यान्डसँग नेपालले पहिलो पटक खेल्न लागेको हो । नेपाल क्रिकेट संघ ९क्यान० ले दर्शकका लागि मैदान प्रवेश निःशुल्क गरेको छ ।
