चितवन / उज्यालो नेपाल पार्टीका अध्यक्ष कुलमान घिसिङ आज (मंगलबार) चितवन आउने भएको छ । अध्यक्ष घिसिङ भरतपुर विमानस्थलमा बिहान साढे ११ बजे आइपुग्ने उज्यालो नेपाली पार्टी चितवनका अध्यक्ष तथा संयोजक समीर केसीले जानकारी दिए ।
संयोजक केसीका अनुसार अध्यक्ष घिसिङको विमानस्थलको सभाहलमा पहिलो कार्यक्रम पत्रकारसँग भेटघाट रहेको छ । विमानस्थलबाट चौविसकोठीसम्म र्याली निकालिने छ भने अध्यक्ष घिसिङको छोटो सम्बोधन रहने उनले बताए ।
- ADVERTISEMENT -
त्यसलगतै अध्यक्ष घिसिङ चनौलीका लागि प्रस्थान गरिने कार्यक्रम रहेको बताइएको छ । आज दिनभर व्यस्त रहने घिसिङको कार्यक्रममा सबै नेपाली जनसमुदायलाई सहभागिताको लागि उज्यालो नेपाल पार्टी चितवनले आह्वान समेत गरेको छ ।
चनौली कार्यक्रम पश्चात क्षेत्र नं. १ स्थित टाँडी, राप्ती, पर्सा, खैरहनीलगायत सबै स्थानमा भेटघाट कार्यक्रम रहने संयोजक केसीले बताए । उज्यालो नेपालको नायकका रुपमा परिचय बनाउन सफल घिसिङको चितवन आगमनलाई विशेष रुपमा हेरिएको छ ।
मुलुकलाई भ्रष्टाचारमुक्त बनाउने लक्ष्य लिएको उज्यालो नेपाली पार्टीले आसन्न प्रतिनिधि सभा सदस्य निर्वाचनमा देशैभरबाट उमेदवारी घोषणा समेत गरेको छ ।
