चितवन / हानामी तेस्रो चितवन गोल्डकप फुटबलको उपाधि एप्पल गुरु सूर्यपुर एफसी कालिकाले जितेको छ । शनिबार सम्पन्न उपाधि भिडन्तमा आयोजक हानामी भरतपुर फुटबल क्लब बिएफसीलाई हराउँदै सूर्यपुर च्याम्पियन बनेको हो ।
नेपाल प्रहरी शिक्षालय भरतपुर तालिमकेन्द्रको मैदानमा भएको फाइनलमा सूर्यपुरलाई जिताउन लक्षु थापा र अविनास स्याङताङ्गले एक–एक गोल गरे । खेलको ७३ औं मिनेटमा लक्षुको गोलमा सूर्यपुरले अग्रता लिएको थियो ।
- ADVERTISEMENT -
अतिरिक्त समयमा सूर्यपुरले पेनाल्टी पायो । बिएफसीका विवेक मगरले दिपेश गुरुङलाई बक्सभित्र लडाएपछि सूर्यपुरले पेनाल्टी पाएको थियो । प्राप्त पेनाल्टीमा अविनासले गोल गर्दै जित सुनिश्चित गरे । सूर्यपुरका लक्षु थापा फाइनल खेलको केल्मी प्लेयर दि म्याच बने ।
विजेता सूर्यपुरले ट्रफीसहित ६ लाख रुपैयाँ प्राप्त गरेको छ । उपविजेतामा सीमित बिएफसीले ३ लाखमा चित्त बुझाएको छ । विधागत उत्कृष्टतर्फ सूर्यपुरका अविनास स्याङताङ्ग प्रतियोगिताभरको उत्कृष्ट खेलाडी बने । उनले ४० हजार रुपैयाँ प्राप्त गरे ।
- ADVERTISEMENT -
सूर्यपुरका विशाल सुनार उत्कृष्ट गोलकिपर, बिएफसीका विवेक मगर उत्कृष्ट डिफेन्डर, बिएफसीकै आकाश थापा मगर उत्कृष्ट मिडफिल्डर बने । यस्तै ४ गोल गरेका देवदह ब्वाईज रुपन्देहीका सुजित बुढाथोकी सर्वाधिक गोलकर्ता बने। उनीहरूले १०–१० हजार रुपैयाँ प्राप्त गरे ।
