काठमाडौं / इस्लाम धर्मावलम्बीहरूको एक महिना लामो कठोर आत्मसंयम र उपासनाको पर्व ‘रमजान’ सकिएसँगै आज (शनिबार) देशभरका मुस्लिम समुदायले हर्षोल्लासका साथ ‘इद उल फित्र’ मनाउँदै छन् । अरबी पात्रो हिजरी संवतको नवौँ महिनाभरि निराहार व्रत ९रोजा० बसेका बुवाआमा, युवा तथा बालबालिकाहरू आज बिहानैदेखि सामूहिक नमाज र खुसी साटासाटमा व्यस्त देखिएका छन् ।
आजको मुख्य आकर्षणका रूपमा राजधानीको घण्टाघरस्थित नेपाली जामे मस्जिद र काश्मिरी मस्जिदमा बिहानै विशेष नमाज पाठ गरिएको छ । मस्जिद तथा देशका विभिन्न भागमा रहेका ‘इदगाह’ हरूमा सामूहिक प्रार्थनापछि एक(अर्कामा अङ्कमाल गर्दै शुभकामना आदानप्रदान गर्ने भक्तजनहरूको ठूलो भिड लागेको छ । नमाज सम्पन्न भएपछि आगामी तीन दिनसम्म आफूभन्दा ठूला मान्यजनकोमा पुगेर आशीर्वाद लिने र मिठा परिकार खाएर खुसी मनाउने प्रचलन रहेको छ ।
- ADVERTISEMENT -
इद सामाजिक सेवा र परोपकारसँग प्रत्यक्ष जोडिएको पर्व हो । ‘इद उल फित्र’ को शाब्दिक अर्थ नै दान गरेर गरिब र असहायलाई खुसी तुल्याउनु हो । यस अवसरमा प्रत्येक मुस्लिम परिवारले आफ्नो वार्षिक आम्दानी र बचतको साढे दुई प्रतिशत हिस्सा ‘जकात’ ९नगद वा जिन्सी दान० का रूपमा विपन्न वर्गलाई बुझाउनुपर्ने धार्मिक प्रावधान छ ।
यसका साथै, ‘सत्कार फितर’ अन्तर्गत प्रत्येक व्यक्तिले गहुँ वा सो बराबरको नगद दान गर्ने गर्दछन् । यो दान परिवारमा आमाको गर्भमा रहेको शिशुको नाममा समेत गर्नुपर्ने नियमले इस्लाम धर्ममा दानको महत्त्व कति छ भन्ने स्पष्ट पार्छ । यसरी सङ्कलन भएको सहयोग दीनदुःखी र असहायको जीविकोपार्जनमा खर्च गरिन्छ ।
पर्वको अवसरमा मुस्लिम समुदायले नयाँ वस्त्र पहिरिने, घरमा सेवई र खजुर जस्ता मीठा परिकारहरू तयार गरी पाहुनालाई सत्कार गर्ने गर्दछन् । एक महिनासम्म सूर्योदयदेखि सूर्यास्तसम्म अन्नजल त्याग गरी गरिएको ‘रोजा’ को अन्त्य भएसँगै आजको दिनलाई विजय र उत्सवको रूपमा लिइन्छ ।
यसै पावन अवसरमा नेपाल सरकारले आज देशभर सार्वजनिक बिदा दिएको छ । यो पर्वले नेपाली समाजमा रहेको धार्मिक सहिष्णुता, आपसी सद्भाव र भाइचाराको सम्बन्धलाई अझ प्रगाढ बनाउन महत्वपूर्ण भूमिका खेल्ने विश्वास गरिएको छ ।
