भरतपुर / चितवनमा दोस्रो संस्करणको ‘बागमती साहित्य महोत्सव’ हुने भएको छ । नारायणगढस्थित उद्योग वाणिज्य संघको हलमा यही जेठ १६ र १७ गते महोत्सव आयोजना गर्न लागिएको बुधबार पत्रकार सम्मेलन मार्फत जानकारी दिइएको हो ।
संस्कृति तथा पर्यटन मन्त्रालय बागमती प्रदेश सरकारको सहकार्य तथा भरतपुर महानगर प्रज्ञाप्रतिष्ठानको संयोजनमा कार्यक्रम हुने भएको हो । गतवर्ष धादिङमा सम्पन्न भएको ‘बागमती साहित्य महोत्सव’को दोश्रो संस्करण भने चितवनमा हुँदैछ ।
- ADVERTISEMENT -
भरतपुर महानगर प्रज्ञाप्रतिष्ठानका अध्यक्ष प्राडा नारायणप्रसाद खनालका अनुसार महोत्सवमा बागमती प्रदेशका विभिन्न जिल्लाका साहित्यकार, कलाकार तथा संस्कृतिकर्मीहरुको सहभागिता रहने छ ।
दुई दिनसम्म सञ्चालन हुने महोत्सवमा कविता वाचन, कथा तथा गजल प्रस्तुति, नाटक मञ्चन, साहित्यिक बहस, साङ्गीतिक प्रस्तुतिलगायत विविध कार्यक्रम समावेश गरिएका छन् । ‘नेपाली साहित्यको वर्तमान अवस्था’, ‘डिजिटल युगमा कला र साहित्यको भविष्य’जस्ता विषयमा छलफल तथा अन्तक्र्रिया गरिने छ ।
महोत्सवका कार्यक्रम संयोजक तथा डिभिजन वन कार्यालय चितवनका प्रमुख विष्णुप्रसाद आचार्यले हरेक वर्ष बागमती प्रदेशका कुनै न कुनै जिल्लाको कला, संस्कृति, साहित्यजस्ता विषयलाई समेटेर प्रवद्र्धन गर्ने उद्देश्यका साथ आयोजना गरिने महोत्सवले पुस्तान्तरणसँगै समृद्ध समाज निर्माणमा टेवा पुग्ने बताए ।
