भरतपुर / पूर्व–पश्चिम राजमार्गअन्तर्गत चितवनको रत्ननगर नगरपालिका–९ स्थित टिकौली जंगलमा मिनी ट्रक र स्कुटर आपसमा ठोक्किँदा एक जनाको मृत्यु भएको छ।
चितवन प्रहरीका अनुसार आज बिहान (शनिबार) करिब २ः५० बजे टाँडीबाट भरतपुरतर्फ जाँदै गरेको लु.प्र.०१–००१ ख ००४५ नम्बरको मिनी ट्रक र भरतपुरबाट टाँडीतर्फ आउँदै गरेको ना.३७प ७०९६ नम्बरको स्कुटर आपसमा ठोक्किएका थिए ।
- ADVERTISEMENT -
दुर्घटनामा स्कुटर चालक चितवनको राप्ती नगरपालिका–७ निवासी ३८ वर्षीय राजकुमार दर्जी गम्भीर घाइते भएका थिए । उनलाई तत्काल उपचारका लागि नयाँ मेडिकल कलेज भरतपुर पठाइएको थियो ।
गम्भीर घाइते दर्जीको उपचारका क्रममा बिहान ६ः३० बजे मृत्यु भएको प्रहरीले जनाएको छ ।
- ADVERTISEMENT -
दुर्घटनापछि घटनास्थलमा इलाका प्रहरी कार्यालय टाँडीबाट खटिएको प्रहरी टोलीले मिनी ट्रक र चालक रुपन्देहीको गैडहवा गाउँपालिका–७ निवासी ४० वर्षीय रामेश्वर खरविन्द्रलाई नियन्त्रणमा लिएको छ ।
घटनाबारे थप अनुसन्धान भइरहेको प्रहरीले जनाएको छ ।
