लकडाउन थपेसँगै सुरक्षा सतर्कतामा कडाइ

भरतपुर । सरकारले आइतबार साँझ लकडाउन थप १० दिन गरेसँगै लकडाउनमा कडाइ गरेको छ । सुरक्षाकर्मीद्वारा नारायणगढको लायन्सचोक, पुल्चोकलगायत विभिन्न स्थानमा पास अनिवार्य तथा विना काममा हिँड्नेलाई कारवाही गरिएको छ ।
कोरोना भाइरस दिनानुदिन बढेसँगै लकडाउनमा पनि जिल्ला प्रहरी कार्यालय चितवनले कडाइ गर्दै आइरहेको छ ।
यस्तै गृह मन्त्रालयले कोरोना भाइरस (कोभिड–१९) को संक्रमण फैलिन नदिन लगाएको लकडाउनमा कडाइ गर्न सुरक्षा निकाय र स्थानीयलाई परिपत्र गरेको छ ।
लकडाउन खुकुलो भएको गुनासो बढेपछि गृह मन्त्रालयले सोमबार सुरक्षा निकाय र ७७ वटै जिल्लाका प्रशासन कार्यालयलाई परिपत्र गर्दै पास विनाका सवारी आवातजावतमा पूर्ण रुपमा रोक लगाउन निर्देशन दिएको हो ।
गृहको परिपत्र लगत्तै प्रहरीले लकडाउन उल्लघंन गर्नेहरुलाई कावाही गर्न थालेको छ । लकडाउनलाई सरकारले बैशाख २५ गते लम्ब्याएको छ । अहिलेसम्म मुलुकमा ५२ जनामा कोरोना संक्रमण पुष्टि भइसकेको छ भने १६ जना निको भई घर फर्केका छन् ।