एपिएफले चुम्यो महिला राष्ट्रिय लिगको उपाधि

काठमाडौं / महिला राष्ट्रिय लिगको उपाधि एपिएफले उचालेको छ । दशरथ रंगशालामा भएको लिगको अन्तिम खेलमा अर्काे विभागीय टोली त्रिभुवन आर्मी फुटबल क्लबलाई ३–० गोलले पराजित गर्दै एपिएफ विजयी भएको हो । यससँगै प्रतियोगितामा आफ्नो शतप्रतिशत जितको यात्रा एपिएफले पूरा गरेको छ ।
लिगको खेलमा सरु लिम्बूको दुई र अनिता केसीको एक गोलको मद्दतले एपिएफले सहज जित हासिल गरेको हो । एपिएफका सरुले खेलको ४५औँ मिनेटमा गरिएको १ गोलले अघि बढ्न हौसला प्रदान गरेको थियो ।
खेलमा अनिताले मिलाइदिएको पासमा सरुले गोल गरेकी थिइन् । एपिएफले दोस्रो हाफमा थप दुई गोल गरेको थियो । एपिएफका अनिताले गरेको खेलको ८६औँ मिनेटमा २–० को अग्रता दिलाइन् । अञ्जली योञ्जनले क्रस गरेको बललाई आकर्षक हेडिङमार्फत अनिताले टोलीलाई अघि बढाएकी थिइन् ।
खेलको अतिरिक्त समयमा आर्मीकी गोलरक्षक अञ्जना रानामगरले क्लियर गर्न पन्च गरेको बललाई गोलमा परिणत गर्दै सरुले टोलीको जित ३–० ले पक्का गरेकी थिइन् ।
एपिएफले प्रतियोगितामा शतप्रतिशत जित निकाल्ने क्रममा विपक्षीविरुद्ध सर्वाधिक ७७ गोल पनि ग¥यो । एपिएफले लिगमा उदयपुरको चौदण्डीगढी नगरपालिकाविरुद्ध २२–० को सर्वाधिक ठूलो अन्तरको जित निकालेको थियो । त्यसको तुलनामा विपक्षीसँग उसले मात्रै एक गोल बेहो¥यो । यो लिगमा एपिएफले नेपाल पुलिससँग मात्रै गोल बेहोरेको हो । पुलिसकी अमृता जैसी यो लिगमा एपिएफविरुद्ध गोल गर्ने एक्ली खेलाडी बनिन् ।