भरतपुर अस्पतालमा ओपिडि सेवामा १ घण्टा थप

0
8

चितवन / भरतपुर अस्पतालको ओपिडि (बहिरंग) सेवा असोज १ गतेदेखि थप १ घण्टा बढाइने भएको छ । जसअनुसार अस्पतालले अब दैनिक ६ घण्टा सेवा दिने भएको हो । यसअघि दैनिक पाँच घण्टा यो सेवा सञ्चालन दिँदै आएको थियो ।
दैनिक १० वजेबाट तीन वजेसम्म वहिरंग सेवा दिदै आएकोमा अब बिहान एक घण्टा थप गर्न लागिएको अस्पतालका मेडिकल सुपरिटेण्डेन्ट प्रा. डा. कृष्ण पौडेलले जानकारी दिए । डा पौडेलका अनुसार बिहान ८ बजेदेखि ११ बजेसम्म काटिदैं आएको टिकट दिउँसो १२ बजेसम्म काटिने भएको छ ।
अस्पतालमा बिरामीको अत्याधिक चाप र बाहिरबाट आउनेले उपचार पाउन कठिन हुने गरेकाले वहिरंग सेवाको समय बढाइएको अस्पतालले जनाएको छ । संघीय अस्पताल भरतपुरमा ६ सय शैया रहेका छन् । चितवन सहित १९ भन्दा बडप् जिल्लाबाट बिरामी उपचारका लागि आउने यस अस्पतालमा एकै दिनमा दुई हजार जनासम्मले वहिरंग सेवा लिएको तथ्याङ्क छ ।
अस्पताल बिकास समितिका अध्यक्ष डा. भोजराज अधिकारीले लामो समय पालो कुर्नुपर्ने अवस्थालाई व्यवस्थापन गर्ने विषयमा अध्ययन भईरहेको बताए । उनले भने, ‘बिरामीको चाप बढ्दा सेवाग्राहीले घण्टौं कुर्नु पर्ने समस्या छ । यसरी ओपीडी समय विस्तार गर्दा बिरामीलाई राहत पुग्ने छ ।’ यसले कोभिड समयमा हुने भीडभाडबाट संक्रमण फैलन सक्ने जोखिम समेत कम हुने उनको भनाई छ ।