८ महिने बालकको उपचारका लागि सहयोग जुटाइदिन अपिल

मकवानपुर / मकवानपुरका ८ महिने बालक प्रमेश पौडेल टाउकोको समस्याका कारण हाल काठमाडौंको महाराजगञ्जस्थित कान्तिबाल अस्पतालमा उपचाररत छन् । मकवानपुरगढी गाउँपालिका वडा नम्वर–३ निवासी फणिन्द्र पौडेलका छोरा प्रमेश लामो समयदेखि टाउकोको समस्याका कारण उपचाररत छन् । उपचारको लागि आवश्यक रकम जोहो गर्न कठिनाई भएकाले पौडेल परिवारले सहयोग जुटाइदिन सबैसमक्ष अपिल गरेका छन् ।
प्रमेशको गत वर्ष २०७७ साल माघ महिनामा हेटौंडा अस्पतालमा जन्म भएको थियो । जन्म भएको केहीदिनमा नै जन्डिसबाट पीडित बनेका उनलाई उपचारको लागि चितवनको सीएमसी अस्पतालमा लगिएको थियो । उपचारकै क्रममा प्रमेशलाई टाउकाको समस्यासमेत देखियो । चिकित्सकले टाउको सम्बन्धी समस्या देखाउँदै केही महिनाको लागि औषधी दिएर घर पठाएका थिए । तर, केही दिनमा नै टाउकोको समस्या बल्झिएपछि उनलाई कान्तिबाल अस्पताल लगियो । कान्तिबालले पनि औषधी घर पठाएको भएपनि बालकको स्वास्थ्य अवस्थामा सुधार भने आएन ।
हेटौंडाका विभिन्न अस्पतालहरुमा पनि उनको उपचार गराइयो । अहिले पुनः विरामी बालकलार्ई उपचारको लागि कान्तिबालमै लगिएको छ । पटक–पटक अस्पताल जाँदै औषधी प्रयोग गर्दै घर फर्काएका उनलाई यो पटक भने लामो समय अस्पतालमा राख्न परेको पौडेल परिवारको भनाई छ । उनलाई पछिल्लो समय कान्तिबाल अस्पतालमा उपचारको लागि राखिएको २० दिन भयो । खेतीकिसानी गर्दै आएका फणिन्द्र हाल छोरासँगै अस्पतालमा छन् । उनकी श्रीमती सुस्मा पौडेल सामान्य गृहिणी हुन् । एकातिर घरव्यवहार धान्न मुस्किल भएको र अर्कोतिर छोराको उपचार कसरी गराउने भन्ने चिन्ता आफुहरुलाई रहेको उनीहरुको गुनासो छ ।
जग्गा धितो राखेर निकालिएको १० लाखभन्दा बढी पैसा उपचारमा खर्च भइसकेको र अब आर्थिक जोहो गर्ने कुनै उपाय नभएकोले प्रमेशका हजुरबुवा ज्ञानबहादुरले सबैसमक्ष आर्थिक सहयोग जुटाइदिन अनुरोध गरेका छन् । सहयोग गर्न चाहनेल उनको मोवाइल नम्वर ९८४५२७०६०३ मा सम्पर्क गर्न उनले अनुरोध गरेका छन् ।