पुस २५ देखि माघ ४ गतेसम्म चितवन महोत्सव हुने

0
24
File Photo

चितवन / चितवनको नारायणी नदी किनारमा चितवन महोत्सव हुने भएको छ । कोभिडका कारण गत वर्ष हुन नसकेको उक्त महोत्सव पुस २५ गतेदेखि माघ ४ गतेसम्म हुने भएको हो । कोभिडको जोखिम कायमै रहेकाले थोरै कक्ष राखेर महोत्सव गर्न लागिएको जानकारी गराएको छ ।
उक्त महोत्सवमा उद्योग वाणिज्य सङ्घ चितवन आयोजक र भरतपुर महानगरपालिका एवं जिल्ला समन्वय समिति चितवन महोत्सवको प्रबन्धक रहने छन् । उद्योग वाणिज्य सङ्घ चितवनका अध्यक्ष राजु श्रेष्ठको संयोजकत्वमा मूल आयोजक समिति गठन गरिएको छ ।
उनका अनुसार यस वर्ष महोत्सवमा ३५० कक्ष रहनेछन् । अघिल्ला महोत्सवमा ५०० भन्दा बढी कक्ष राखिएको थियो । उनले कोभिडका कारण सुरक्षा सतर्कता अपनाएर महोत्सव गर्नुपर्ने भएकाले कक्ष संख्या घटाइएको जानकारी दिए ।
महोत्सवमा डोमसहितका आकर्षक कक्षसमेत रहने छन् । महोत्सवमा स्वदेशीसहित भारत, चीन, पाकिस्तान, बङ्गलादेशलगायतका देशका उत्पादनकोसमेत कक्ष रहने छ ।
महोत्सव अवधिमा दिनहुँजसो विभिन्न विषयमा गोष्ठी हुने आयोजकले जानकारी दिए । गोष्ठीले चितवनलाई आर्थिक केन्द्र बनाउन सहयोग पु¥याउने सङ्घका वरिष्ठ उपाध्यक्ष चुननारायण श्रेष्ठले जानकारी दिए ।
महोत्सव परिसरमा विभिन्न संस्कृति झल्कने नमूना घरसँगै कृषि, पर्यटन, कलासंस्कृति झल्कने कक्ष रहने उनले भने । महोत्सवमा दुई लाखभन्दा बढीले अवलोकन गर्ने अपेक्षा गरिएको छ । महोत्सव व्यवस्थित गर्न स्टेरिङ कमिटी बनाएर काम अघि बढाइएको उनले बताए ।
विसं २०५३ देखि सुरु भएको महोत्सवको यो १३औँ संस्करण हो । हरेक दुई÷दुई वर्षमा महोत्सव हुँदै आएको थियो ।