कुरिनटार र जरबिरेमा पहिरो, गुल्मीमा एकै परिवारका ४ जनाको मृत्यु

0
19

चितवन / पृथ्वीराजमार्ग र नारायणगढ–मुग्लिन सडक खण्ड गरी दुईमा ठाउँमा शनिबार बिहान ४ बजे पहिरो गएको छ ।
पहिरोको कारण अहिले इच्छाकामना गाउँपालिका–४ कुरिनटारको राजमार्ग अवरुद्ध भएको छ । बिहान ४ बजेको अविरल वर्षाले कुरिनाटरमा पहिरो जाँदा बाटो अवरुद्ध भएको जिल्ला प्रहरी कार्यालय चितवनका प्रवक्ता सूर्यबहादुर थापाले जानकारी दिनुभयो । पहिरोको कारण सवारी साधनहरु आवातजावतमा अवरोध भएको प्रवक्ता थापाले बताउनुभयो ।
यसैगरी नारायणगढ–मुग्लिन सडक खण्डको जलविरेमा पनि पहिरो खसेको छ । शनिबार बिहान ४ बजे नै पहिरो खसेकाले एकतर्फी बाटो मात्रै संचालनमा रहेको छ ।
त्यसैगरी गुल्मीको पहिरोमा परेर एकै परिवारका चार जनाको ज्यान गएको छ । रुरुक्षेत्र गाउँपालिका ५ अन्तर्गत टाहाटिम नजिकै आँटीपाटामा शुक्रबार राति स्थानीय राजु माझीको घर पहिरोले पुरिएको हो । पहिरोमा परेर ज्यान जानेमा राजु बोटेमाझीकी श्रीमती वर्ष ३० की बीना, उनका छोराहरु वर्ष १० का हेमन्त, वर्ष ७ का सागर र दश महिनाकी छोरी विनिता रहेको रुरुक्षेत्र गाउँपालिका–५ का वडाध्यक्ष हरिप्रसाद ज्ञवालीले जानकारी दिनुभयो ।