भेटेरान कपको सेमिफाइनल समिकरण पूरा

0
294

भरतपुर । भरतपुर गेष्ट हाउसमा जारी ‘प्रथम अन्तर्राष्ट्रिय आमन्त्रण चितवन भेटेरान कप फुटबल’को प्रतियोगिता अन्तर्गत सोमबार ४ खेलको सेमिफाइनल समिकरण पूरा भएको हो ।
उक्त प्रतियोगिताको पहिलो खेलमा झापा भेटेरानले रुपन्देही भेटेरान बुटवललाई २–० गोल अन्तरले विजयी भएको छ । फाइनल प्रवेशका लागि झापाले आयोजक चितवन रातोसँग भिड्ने छ ।
त्यसैगरी दोस्रो खेलमा चितवन रातोले देहरादुन एफ सि भारतलाई ५–१ को भारी गोल अन्तरले हराएको थियो । चितवनको जितमा रविन्द्र श्रेष्ठले ह्याट्रिक गरेका थिए । उनले खेलको सातौं, दशौं, पैंतिसौं मिनेटमा गोल गरेका थिए । यस्तै चक्र पुनले २७ र ३७ औं मिनेटमा गरी २ गोल हान्न सफल भएका थिए ।
यसैगरी अर्को खेलमा रोयल भेटेरान दार्जिलिङले चितवन भेटेरान नीलोलाई ५–१ ले पराजित गरेको थियो । दार्जिलिङका पाल्देन भुटिया (पिटर) ले खेलको १४औं, १५औं र ३६औं मिनेटमा गोल गरे । यस्तै बी बन्तवाले २५ तथा प्रनव घोसले ४७औं मिनेटमा गोल गरे । चितवन नीलोको लागि मदन दराईले एक मात्र गोल गर्न भ्याए । फाइनल प्रवेशका लागि दार्जिलिङले टि भेटेरान ललितपुरको सामना गर्नेछ ।
प्रतियोगिताको अन्तिम खेलमा टि बर्गर ललितपुरले नाइट किङ काठमाडौंमा १–० ले पाखा लगाउँदै सेमिफाइनलमा स्थान बनाएको छ । टि बर्गरको जितमा राजेश लेप्चाले खेलको ३३ औं मिनेटमा निर्णायक गोल गरेका थिए ।
भोलि मंगलबार बिहान ७ः३० बजे रोयल भेटेरान दार्जिलिङ र टि बर्गर ललितपुर तथा ८ः३० बजे झापा भेटेरान र चितवन भेटेरान रातो बीच प्रतिस्पर्धा हुनेछ । प्रतियोगिताको फाइनल भोलि दिउँसो ३ बजे हुनेछ ।
प्रतियोगिताको बिजेताले नगद रु १ लाख ११ हजार १ सय ११ सहित शिल्ड मेडल र प्रमाण पत्र प्राप्त गर्नेछ भने उपबिजेताले ५० हजार ५ सय ५५ रुपैँयामा चित्त बुझाउनेछ । प्रत्येक दिन म्यान अफ म्याचले एक हजार तथा उत्कृष्ट गोलरक्षक, उत्कृष्ट डिफेन्डर र सर्वाधिक गोलकर्ताले नगद ५–५ हजार प्राप्त गर्नेछ । यस्तै प्रतियोगिताभरको उत्कृष्ट खेलाडीले १० हजार रुपैया प्राप्त गर्ने आयोजकले जनाएको छ ।