२४ दिनमै आमा गुमाएका एक शिशुलाई सहयोग

भुम्लिचोक / जन्मिएको २४ दिनमै आमा गुमाएका साँढे २ महिनाका शिशुका लागि नमस्ते किड्स नेपालका अध्यक्ष सगुन गुरुङले सहयोग गर्नुभएको छ ।
गोरखाको गण्डकी गाउँपालिका ६, तोमनडाँडाका साँढे २ महिने प्रेमबहादुर चेपाङ सहितका परिवारका लागि गुरुङले खाद्यान्न, लत्तकपडा, बालकलाई आवश्यक ल्याक्टोजिन लगायत सहयोग गरेको हो ।
चामल १ बोरा, नुन, खाने तेल, दाल, मसला, ल्याक्टोजिन, प्याम्पस, बच्चा र हजुरआमाको लागि लत्ता कपडा लगायत १० हजार रुपैयाँ बराबरको सहयोग गरिएको उहाँले बताउनुभयो ।
नेपाल पत्रकार महासंघ लमजुङ शाखाका अध्यक्ष आश गुरुङ स्वयं सगुन गुरुङ चेपाङको घरमा पुगेर सोमबार प्रेम बहादुरका हजुरआमा चन्द्रमाया चेपाङलाई खाद्यान्न र लत्तकपडालगायत सहयोग हस्तान्तरण गरिएको हो । सहयोग हस्तान्तरण कार्यक्रममा वडा नं. ६ का सदस्य रेशम चेपाङ, स्थानीय युवा अगुवा रामबाबु गुरुङ, कविन गुरुङ लगायतले सहयोग गरेका थिए ।
मुटुसम्बन्धी समस्या भएका आशमाया चेपाङले गत जेठ १० गते प्रेमबहादुरलाई जन्म दिनुभएको थियो । छोरालाई जन्म दिएको २४ दिनमा असार ४ गते उपचारका क्रममा काठमाडौंमा निधन भएको थियो । परिवारलाई पालनपोषण गर्न धन कमाउन गत माघमा भारत गएका प्रेमबहादुरका बुवा दलबहादुर चेपाङ घर आउन सक्नुभएको छैन । कोरोना संक्रमण, लकडाउनले सीमा क्षेत्रमा कडाई साथै भारत र नेपालमै पनि कडाईले गर्दा भारतको बैङ्लोरमा काम गर्दै आएका दलबहादुर आफ्नो श्रीमती निधन हुँदा पनि आउन सक्नुभएन ।
बुवा विदेश र आमा निधन भएपछि टुहुरिएका प्रेमबहादुर चेपाङ अहिले हजुरआमा नरबहादुर चेपाङ र हजुरआमा चन्द्रमाया चेपाङले पालानपोषण गराउँदै आउनुभएको छ । घरायसी आर्थिक अवस्था नाजुक रहेको चेपाङ परिवारलाई गण्डकी गाउँपालिकाले पनि यसअघि १० हजार रुपैयाँ सहयोग गरिसकिएको छ ।