चितवनमा विंगर दुर्घटना हुँदा १० जना घाइते

चितवन / पूर्वी चितवनमा हेटौंडाबाट नारायणगढ आउँदै गरेको विंगर (गाडी) दुर्घटनामा परेको छ । पूर्वी चितवनको राप्ती नगरपालिका वडा नम्बर ४ लक्ष्मीनारायण चोक नजिक हिजो (शुक्रबार) भएको उक्त दुर्घटनामा १० जना घाइते भएका छन् ।
हेटौँडाबाट नारायणगढतर्फ आउँदै गरेको बागमती प्रदेश ०३–००१ ज ०१७१ नम्बरको विंगर अनियन्त्रित भई पल्टेको जिल्ला प्रहरी कार्यालय चितवनले जनाएको छ ।
चितवन प्रहरी प्रवक्ता नरहरि अधिकारीका अनुसार घाइते हुनेहरुमा गोरखाको आरुघाट गाउँपालिका १ बस्ने २३ वर्षीय आशवीर गुरूङ, दार्चुला महाकाली नगरपालिका ३ बस्ने ३६ वर्षीय शेरसिंह महरा, भरतपुर महानगरपालिका १३ बस्ने २३ वर्षीया समीक्षा निरौला, लमजुङको बेसीशहर नगरपालिका १ बस्ने २७ वर्षीय सोसन गुरूङ, माडी नगरपालिका ५ बस्ने २३ वर्षीय सागर बोट रहेका छन् ।
यसैगरी, रौतहटको परोहा नगरपालिका ६ बस्ने २३ वर्षीय अमरनाथ जैसवाल, मकवानपुरको हेटौँडा उपमहानगरपालिका१३ बस्ने २७ वर्षीय सुनिल रिमाल, विंग्नर गाडीका चालक नवलपरासीको देवचुली नगरपालिका १ बस्ने ४१ वर्षीय तीनबहादुर विक, भरतपुर महानगरपालिका १२ बस्ने ४० वर्षीया उषा दंगोल र तनहुँ घर भई हाल भरतपुर महानगरपालिका १२ बस्ने २५ वर्षीय नवीन केसी रहेका छन् ।
घाइतेहरुको पुरानो मेडिकल कलेज भरतपुरमा उपचार भइरहेको प्रवक्ता अधिकारीले बताए ।