तरकारी बजारमा आगलागी हुँदा करिब डेढ करोडको क्षति

हेटौंडा / तरकारी बजारमा आगलागी हुँदा ५ वटा तरकारी पसल र एउटा होटलमा पूर्ण रुपमा क्षति भएको छ । हेटौंडा १० टिसिएनस्थित उक्त तरकारी बजारमा बिहीबार दिउँसो आगलागी भएको जिल्ला प्रहरी कार्यालय मकवानपुरले जनाएको छ ।
आगलागी दिउँसो १२ः३८ बजेको समयमा भएको र करिब डेढ करोडभन्दा बढी क्षति भएको अनुमान गरिएको छ । नेपाल फलफूल तथा तरकारी व्यवसायी संघ मकवानपुरका महासचिव कृष्ण हुमागाईंका अनुसार मीना गुरुङले संचालन गरेको होटलबाट आगो सल्किएको थियो ।
उक्त आगलागीबाट हरि खुलाल, दशरथ महर्जन, केशव दाहाल, बद्री घिमिरे र भरत खुलालले सञ्चालन गरेको तरकारी पसलमा गरी डेढ करोडभन्दा बढीको क्षति भएको अनुमान छ ।
तरकारी पसलमा रहेको नगदसमेत जलेर आगलागीबाट नष्ट भएको छ भने केही आधा मात्रै जलेको नोट प्रहरीले फेला पारेको छ । होटलमा लगातार ८ वटा ग्याँस सिलिण्डर पड्किएको थियो । होटलमा सल्किएको आगो तरकारी पसलहरुमा फैलिएको हो ।
आगलागीको कारण खुलिनसकेको भएपनि विद्युत सर्ट भएर आगलागी भएको हुनसक्ने प्रहरीको प्रारम्भिक अनुसन्धानबाट खुलेको छ । करिब ढेड घण्टापछि नेपाल प्रहरी, सशस्त्र र जनपथ प्रहरीसमेतको सहयोगमा हेटौंडा उपमहानगरपालिकाको २ वटा दमकल प्रयोग गरी आयो नियन्त्रणमा लिइएको हो ।