पौडी खेल्ने क्रममा एक किशोरको मृत्यु

चितवन / चितवनको कालिका नगरपालिका ९ शक्तिखोरमा पौडी खेल्ने क्रममा डुबेर एक युवकको मृत्यु भएको छ । मृत्यु हुनेमा स्थानीय सिताराम श्रेष्ठका छोरा १६ वर्षीय मनिष श्रेष्ठ रहेको जिल्ला प्रहरी कार्यालय चितवनले जनाएको छ ।
प्रहरीका अनुसार स्थानीय कयरखोलाको बाँधमा पौडी खेल्ने क्रममा शनिबार दिउँसो उनको डुबेर मृत्यु भएको हो । प्रहरी चौकी जुटपानी र ईलाका प्रहरी कार्यालय टाँडीबाट खटिएको टोलीले शव खोलाबाट निकालेको थियो ।
शवको मुचुल्का उठाई पोष्टमार्टमको लागि भरतपुर अस्पताल पठाईएको र आवश्यक कारवाही अघि बढाइएको प्रहरीले जनाएको छ ।