जुरिखेतमा मोटरसाइकल दुर्घटना : दुई जनाको मृत्यु

मकवानपुर । मकवानपुरको भीमफेदी गाउँपालिका वडा नम्वर ६ जुरिखेतमा बुधबार सवारी दुर्घटना हुँदा दुई जनाको मृत्यु भएको छ ।
मृत्यु हुनेहरुमा बाराको पर्सौनि नगरपालिका वडा नम्वर ५ बस्ने २५ वर्षीय लाल बाबु सहनि मलाहा र मोटरसाइकलमा सवार २० वर्षीय गोरख भन्ने रबिन्द्र मण्डल रहेको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए ।
प्रहरी नायव उपरीक्षक कार्कीका अनुसार, बुधबार साँझ ५ बजेको समयमा भीमफेदी–कुलेखानी–काठमाडौं सडकखण्ड अन्तरगत पर्ने उक्त स्थानमा काठमाडौंबाट हेटौंडातर्फ आउँदै गरेको बागमती प्रदेश ०२ ०२० प ४२३७ नम्वरको मोटरसाइकल आफै अनियन्त्रित भई सडकबाट २०० मिटर तल खसेर दुर्घटना भएको थियो ।
दुर्घटनामा परेर मोटरसाइकल चालक लाल बाबु सहनि मलाहा गम्भीर घाइते भएका थिए भने मोटरसाइकलमा सवार रबिन्द्र मण्डल बेपत्ता भएका थिए । दुर्घटनामा परेर गम्भीर घाइते भएका लालबाबुको हेटौंडा अस्पतालमा उपचारको क्रममा बुधबार साँझ साढे ८ बजेको समयमा मृत्यु भएको प्रहरी नायव उपरीक्षक कार्कीले बताए ।
यस्तै, दुर्घटनामा परेर बेपत्ता भएका रबिन्द्रको शव भने आज बिहान फेला परेको उनले बताए । उनको शव इलाका प्रहरी कार्यालय भीमफेदीका प्रहरी निरीक्षकसहितको ७ जनाको टोलीले खोजतलास गर्ने क्रममा आज बिहान साढे ७ बजेको समयमा फेला पारेको जनाइएको छ ।
मृतक लालबाबुको शव हाल हेटौंडा अस्पतालमा राखिएको छ भने रबिन्द्रको शव पनि हेटौंडातर्फ ल्याउने तयारी भइरहेको मकवानपुरका प्रहरी नायव उपरीक्षक कार्कीले बताए ।