काठमाडौं / पतञ्जलि जग्गा प्रकरणमा अध्यक्ष माधवकुमार नेपालमाथि भ्रष्टाचारको मुद्दा दर्ता भएपछि चुलिएको आन्तरिक कलह र नेतृत्वको विवादबीच नेकपा (एकीकृत समाजवादी) ले स्थायी कमिटी, पोलिटब्युरो र केन्द्रीय कमिटीको बैठक बोलाएको छ । पार्टीभित्र सम्मानित नेता झलनाथ खनाल र अध्यक्ष नेपालबीच तीव्र वाकयुद्ध चलिरहेको र नेतृ रामकुमारी झाँक्रीलाई स्पष्टीकरण सोधिएको तनावपूर्ण अवस्थामा यी बैठकहरू आह्वान गरिएका हुन् ।
पार्टी महासचिव घनश्याम भूसालका अनुसार, सबैभन्दा महत्त्वपूर्ण मानिएको केन्द्रीय कमिटीको बैठक आगामी भदौ ७ र ८ गते काठमाडौंको सुकेधारास्थित मिराकल पार्टी भेनुमा बस्ने तय भएको छ । त्यसअघि, भदौ ४ गते स्थायी कमिटी र ५ गते पोलिटब्युरो बैठक पार्टी केन्द्रीय कार्यालय, आलोकनगरमा बस्नेछ । सबै बैठक बिहान ११ बजेदेखि सुरु हुने महासचिव भूसालले जानकारी दिए ।
- ADVERTISEMENT -
विवादको जड : पतञ्जलि प्रकरण र नेतृत्वको प्रश्न
पछिल्लो समय पतञ्जलि योगपीठलाई जग्गा दिने प्रकरणमा अध्यक्ष नेपालमाथि अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेपछि पार्टीभित्रको विवाद सतहमा आएको हो । भ्रष्टाचार जस्तो गम्भीर आरोप लागेपछि पनि अध्यक्ष नेपालले पार्टी नेतृत्व छाड्नुपर्ने नैतिक दबाब बढेको छ ।
यही विषयमा सार्वजनिक रूपमा प्रश्न उठाएको भन्दै पार्टीले सचिवसमेत रहेकी नेतृ रामकुमारी झाँक्रीलाई स्पष्टीकरण सोधिसकेको छ । यसले पार्टीभित्र फरक मत राख्नेहरूलाई निरुत्साहित गर्न खोजिएको भन्दै आलोचना भइरहेको छ ।
त्यसैगरी, सम्मानित नेता झलनाथ खनालले पनि अध्यक्ष नेपालको नेतृत्वमाथि कडा प्रश्न उठाउँदै आएका छन् । स्रोतका अनुसार, खनाल र नेपालबीच यही विषयलाई लिएर पटक(पटक कडा सवालजवाफ चलेको छ, जसले पार्टीको शीर्ष तहमा गहिरो दरार पैदा भएको संकेत गर्छ ।
