काठमाडौं / काठमाडौंमा बिहीबार राति भएको सवारी दुर्घटनामा दुई युवाले ज्यान गुमाएका छन् । काठमाडौं महानगरपालिका–३१, जडिबुटीस्थित आकासे पुल नजिकै भएको उक्त दुर्घटनामा परी स्कुटरमा सवार दुईजनाको मृत्यु भएको प्रहरीले जनाएको छ ।
महानगरीय प्रहरी वृत्त नयाँ बानेश्वरका अनुसार, मृत्यु हुनेमा नवलपरासी सुनौल–१ स्थायी घर भई हाल भक्तपुर लोकन्थली बस्ने २२ वर्षीय शिरिस पौडेल (स्कुटर चालक) र काभ्रेपलाञ्चोक पाँचखाल–२ घर भएका २३ वर्षीय नितेश नेपाल रहेका छन् । गम्भीर घाइते भएका उनीहरूलाई तत्काल ट्रमा सेन्टर पुर्याइए पनि उपचारका क्रममा दुवैको निधन भएको प्रहरीले पुष्टि गरेको छ ।
- ADVERTISEMENT -
प्रहरीका अनुसार, गएराति करिब २ः५० बजे कोटेश्वरबाट जडिबुटीतर्फ जाँदै गरेको लु ४३ प ४९३८ नम्बरको स्कुटर सडक छेउमा रोकिराखेको बा प्र ०१–००६ ख ४२४३ नम्बरको अरनिको यातायातको बसमा ठोक्किएर दुर्घटना भएको थियो। तीव्र गतिका कारण स्कुटर अनियन्त्रित भई बसमा ठोक्किएको प्रारम्भिक अनुसन्धानबाट खुलेको छ ।
घटनास्थलमा प्रहरी टोली पुगी आवश्यक अनुसन्धान गरिरहेको छ
