चितवन / नारायणी नदीमा मिसिने त्रिशूली, कालीगण्डकी लगायतका नदीहरूमा बाढी आएका कारण आज (बिहीबार) बिहानैदेखि नारायणगढ क्षेत्रमा नारायणी नदीमा तुलनात्मक रूपमा पानीको सतह केही उच्च देखिएको छ । जल तथा ऊर्जा आयोगको सचिवालयले नारायणी नदीको डुबान हुने क्षेत्रमा आज साँझसम्मै सतर्क रहन अनुरोध गर्दै सूचना जारी गरेको छ ।
आयोगले त्रिशूली, मर्स्याङ्दी, सेतीगण्डकी, कालीगण्डकी लगायतका नदीहरूमा बाढी बढिरहेको र गण्डकी प्रदेशका पहाडी जिल्लामा आज साँझसम्म थप वर्षा हुने पूर्वानुमान रहेको जानकारी दिएको छ । नारायणी नदी आसपास डुबान भइरहने ठाउँका बासिन्दा साँझसम्मै सतर्क रहनुहोला, जल तथा ऊर्जा आयोगको सचिवालयले बिहीबार बिहान पाँच बजे नै मोबाइल फोनहरूमा पठाएको एसएमएसमा उल्लेख छ।
- ADVERTISEMENT -
जल तथा मौसम विज्ञान विभागको विवरणअनुसार नारायणी नदीको चितवन देवघाट जलमापन केन्द्रमा बिहीबार बिहान पौने ६ बजे नारायणीमा बाढीको तह ६ दशमलव ३२ मिटर छ । यहाँ बाढीको तह सात दशमलव तीन मिटर पुगे चेतावनी र नौ मिटर पुगे खतराको तह मानिन्छ । विभागले बाढीको तह बढ्दो क्रममा रहेको जनाएको छ ।
