चितवन / नेपाल पत्रकार महासङ्घ चितवन शाखाले क्रियाशील पत्रकारलाई लक्षित गरी आयोजना गरेको निःशुल्क आँखा शिविरमा १०१ जना पत्रकारको आँखा परीक्षण गरिएको छ ।
नेपाल नेत्रज्योति सङ्घ चितवनद्वारा सञ्चालित भरतपुर आँखा अस्पतालको सहयोगमा शनिबार आयोजित शिविरमा महासङ्घ चितवन शाखाका सदस्य तथा जिल्लामा क्रियाशील पत्रकारहरूको आँखा परीक्षण गरिएको हो । शिविरमा आवश्यकताअनुसार चश्मा तथा औषधिसमेत निःशुल्क वितरण गरिएको थियो ।
- ADVERTISEMENT -
नेपाल पत्रकार महासङ्घ चितवन शाखाका अध्यक्ष वसन्त पराजुलीले पत्रकारिता पेशामा निरन्तर कम्प्युटर, मोबाइल तथा अन्य डिजिटल उपकरणको प्रयोग गर्नुपर्ने भएकाले पत्रकारहरूको आँखाको स्वास्थ्यलाई ध्यानमा राखेर शिविर आयोजना गरिएको बताए । उनले विगतका वर्षमा झैँ यस वर्ष पनि भरतपुर आँखा अस्पतालसँग सहकार्य गरी पत्रकारहरूको स्वास्थ्यलाई प्राथमिकतामा राखेर कार्यक्रम गरिएको जानकारी दिए ।
अध्यक्ष पराजुलीले पत्रकारहरू आफ्नो स्वास्थ्यप्रति कम ध्यान दिने अवस्थामा रहने भएकाले यस्ता स्वास्थ्यसम्बन्धी कार्यक्रमले उनीहरूलाई नियमित स्वास्थ्य परीक्षणतर्फ प्रेरित गर्ने बताए ।
शिविरका क्रममा तीन जना पत्रकारको आँखामा शल्यक्रिया आवश्यक रहेको पहिचान भएको छ । उनीहरूको शल्यक्रिया अस्पतालले सहुलियत दरमा गर्ने व्यवस्था मिलाएको भरतपुर आँखा अस्पतालका सूचना अधिकारी रमेश घिमिरेले जानकारी दिए । उनका अनुसार पत्रकारहरूको समयअनुकूल हुने गरी शल्यक्रियाको मिति तय गरिनेछ ।
महासङ्घ चितवनले पत्रकारहरूको पेशागत क्षमता विकाससँगै स्वास्थ्य सुरक्षालाई समेत प्राथमिकतामा राख्दै विभिन्न स्वास्थ्यसम्बन्धी कार्यक्रम सञ्चालन गर्दै आएको छ ।
