लामा गुरुङहरुको राष्ट्रिय भेला चितवनमा

भरतपुर । गुरुङ (तमु) लामा बौद्ध धर्म समाज केन्द्रको छैंठौ वार्षिक साधारण तथा तेश्रो राष्ट्रिय भेला हुने भएको छ । समाजले मंगलबार पत्रकार भेटघाटमा शारदानगर टासिलिङ बौद्ध गुम्बामा परिसरमा छैंठौ वार्षिक साधारण तथा तेश्रो राष्ट्रिय भेला हुने बताएको हो ।
भेलामा गुरुङहरुको महान पर्व च्युई (मुसा) ल्होसारको पूर्व सन्ध्यामा सबैको सामूहिक ग्रह शान्ति (त्हें) पूजा र लामा ब्रज नृत्य, विद्वान लामा गुरुहरुबाट धर्म प्रवचन र अवतारी लामा रिन्पोछेज्यूबाट आयू अभिषेक (वाङ्) प्रदान गरिने बताइएको छ । आदिमकालदेखि नै लामा गुरुहरुद्वारा गरिदैँ आइरहेको जन्मदेखि मृत्युसम्मको पूजा कर्मकाण्ड विधि र संस्कारहरुलाई समय सापेक्ष सहज र एकरुपता गर्दै लैजाने तथा धर्म गुरुहरुको बीचमा ज्ञान शिक्षा आदान प्रदान गरी मैत्रीय सम्बन्ध कायम गर्ने लक्ष्य रहेको समाजका केन्द्रीय अध्यक्ष खेन्पो शिर लामा गुरूङले बताए ।
राष्ट्रिय भेलाले बुद्ध दर्शनलाई देशव्यापी बनाउन जागरण सुरू गर्ने गुरूङले बताए । गुरुङका अनुसार पुस ४ गतेदेखि सुरू हुने भेला ६ गते सकिनेछ । समाजका क्षेत्रीय शाखा चितवनका सचिव हितमान गुरूङले ५ गते बिहान ७ बजे नारायणगढमा शान्ति पदयात्रा निकालिने बताए । पुल्चोकदेखि चौबीसकोठीसम्म गुरूङ समुदायको वेशभूषा, संस्कृति झल्काउने कार्यक्रम सहित पदयात्रा निकालिने उनको भनाइ थियो ।
यस्तैगरी भेलाको लुम्बिनी बौद्ध विश्वविद्यालयका उपकुलपति प्राज्ञ. डा हृदयरत्न बज्राचार्यले उद्घाटन गर्ने उनले बताए । पुस ६ गते आइतबार समाजको दोस्रो अधिवेसनले तीन वर्षे कार्यकालका लागि नयाँ नेतृत्व चयन गर्नेछ । भेलापश्चात् चितवन घोषणापत्र सार्वजनिक हुने गुरुङले जानकारी दिए ।