दोषीलाई कारवाही गर्ने प्रतिबद्धता – प्रशासन

भरतपुर\चितवन । प्रहरीले दुईजना पत्रकारमाथि गरेको अमानवीय व्यवहारप्रति जिल्ला प्रशासन कार्यालय चितवन र जिल्ला प्रहरी कार्यालय चितवनले माफी मागेका छन् ।
नेपाल पत्रकार महासंघ चितवनका पत्रकार टोलीले घटनाबारे जानकारी गराएपछि प्रमुख जिल्ला अधिकारी नारायणप्रसाद भट्टराईले प्रहरीबाट भएको गल्तीलाई सच्याउने प्रतिवद्धता व्यक्त गरे । प्रहरीबाट भएको गल्ती सच्याउने र आगामी दिनमा त्यस्तो अवस्था सिर्जना नहुने उनले बताए ।
घटनाबारे जानकारी गराएपछि जिल्ला प्रहरी कार्यालय चितवनका प्रमुख प्रहरी उपरीक्षक नान्तीराज गुरुङले पनि पत्रकारहरुसँग माफी मागेका छन् । उनले आगामी दिनमा त्यस्तो अवस्था हुन नदिने र पत्रकारको परिचय पत्र देखाउँदा दुव्र्यवहारको घटना हुन नदिने प्रतिवद्धता जनाए । हाम्रो नियत दुःख दिने होइन, कसरी भयो यस विषयमा म बुझ्ने उनले बताए ।
जिल्ला प्रहरी कार्यालय चितवनमा भएको छलफलमा नेपाल पत्रकार महासंघ चितवनका अध्यक्ष राधेश्याम खतिवडालगायत सम्पूर्ण पत्रकारहरुले दोषी प्रहरी माथि कारवाही गर्न माग गरेका थिए ।
प्रहरीले सोमबार बिहान भरतपुरको चौबीसकोठीमा समाचार संकलनका लागि पुगेका कायाकैरन दैनिक र रेडियो त्रिवेणीका पत्रकारद्वय विनोदबाबु रिजाल र अर्जुन अधिकारी माथि दुव्र्यवहार गर्दै गिरफ्तार गरेको थियो । उनीहरुमाथि अमानवीय व्यवहार गर्दै क्वारेन्टिनसम्म पु¥याइएको थियो ।