वडालाई उछिन्दै व्यक्तिको राहत

भरतपुर । विश्व अहिले कोरोना भाइरसबाट आक्रान्त भइरहेको छ । खाद्यान्न लगायत मानिसलाई आवश्यक पर्ने सबै आवश्यकीय वस्तुहरु दिनप्रतिदिन अभाव हुँदै गइरहेको छ । सबैभन्दा बढी दैनिक ज्याला, मजदुरी गरेर खाने अति विपन्न वर्गहरु प्रभावित भइरहेको छ ।
नेपाल सरकारले विपन्न वर्ग तथा दैनिक ज्यालादारी गर्ने सबैलाई भोकै रहन नदिने भन्दै विभिन्न खाले राहतको प्याकेज कार्यक्रमहरु पनि संचालन गरिरहेको छ । तर राहतभन्दा राहतपीडित बढी भएको देखिएको छ । यसबाट राहत प्याकेज कम भएको र राहतपीडित बढी भएको स्वतः बुझिन्छ ।
विभिन्न ठाउँमा वडा मार्फत राहत संचालन कार्य भइरहेको पनि छ तर वडाको राहतले नपुगी हुने खाने केही मन भएका मानिसहरुले त्यसमा थप गरेर दिइएको पाइएको छ ।
यस्तै भरतपुर वडा नं. ४ मा बिहीबार राहत लिने व्यक्ति ३५ जना हुँदा वडाबाट दिइएको राहत केवल १० जनालाई मात्र पुगेको सामाजिक अभियान्ता विमल सापकोटाले बताए । उनका अनुसार सरकारले दिएको राहत रकम न्यून भएकोले सबैलाई भाग नपुगेको बताउँछन् । वडाबाट दिइएको राहत कम भएपछि स्थानीय व्यक्ति लीलाधर खरेलबाट अन्य २५ जनालाई राहत जुटाइएको सापकोटाको भनाइ छ ।
अभियन्ता सापकोटाले राहतस्वरुप चामल, दाल, मस्यौरा, नुन, आलुलगायत रु. १ एक हजार ३ सय बराबरको एकझोला दिइएको बताए । यस्तो विषम परिस्थितिमा सबैले आ–आफ्नो ठाउँबाट सक्दो सहयोग गर्न पनि उनले अपिल गरेका छन् ।
यसअघि पनि आनन्दमार्ग टोल सुधार समितिमा १२ घरपरिवारलाई राहत वितरण गरिएको थियो । उक्त राहत वितरणमा पनि वडाको रकम कम भएपछि स्थानीयहरुले आ–आफ्नो ठाउँबाट सहयोग गरेको स्थानीय माधव पौडेलले बताए । राहत वितरण कार्यक्रम पौडेलकै नेतृत्वमा भएको थियो ।