चितवनसहित आठ जिल्लाको स्वाब परीक्षण गर्दै कोभिड–१९ परीक्षण प्रयोगशाला

भरतपुर \ भरतपुर कोभिड–१९ परीक्षण प्रयोगशालाले चितवनसहित आठ जिल्लाको स्वाब परीक्षण गर्दै आएको छ । बागमती प्रदेशको प्रयोगशाला हेटौडामा भए पनि मेडिकल सिटि भएकाले यहाँ पनि प्रयोगशाला सञ्चालनमा ल्याइएको डा नितु अधिकारीले जानकारी दिए ।
डा. अधिकारीका अनुसार आजसम्म आठ जिल्लाका ३ हजार ४ सय २५ स्वाब परिक्षण गरिसकिएको छ । चितवनसहित नवलपुर, मकवानपुर, धादिङ्, नुवाकोट, रुपन्देही, सल्यान र अर्घखाँची जिल्लाबाट परीक्षणका लागि स्वाब पठाउने गरिएको उनको भनाइ छ ।
‘दैनिक २ सय हाराहारी स्वाब परिक्षण गर्ने गरिएको छ ।’ उनले भने ‘अहिले पनि परीक्षणका लागि एक हजार स्वाब आउने गरेका छन् र सो स्वाब परीक्षण गर्न कम्तीमा पाँच दिन लाग्ने छ ।‘
उनले भने भरतपुर महानगरपालिकाको अगुवाईमा भरतपुर कोरोना विशेष अस्पताल स्थापनासँगै प्रयोगशाला सञ्चालनमा ल्याइएको हो । कृषि तथा वन विज्ञान विश्वविद्यालयको प्रयोगशालाका सामग्रीमा उपकरणहरु थप गरी भरतपुर अस्पतालको निगरानीमा प्रयोगशाला सञ्चालनमा आएको हो ।
भरतपुर अस्पतालका प्रमुख मेडिकल सुपरिटेण्डेन्ट डा. श्रीराम तिवारीका अनुसार राजधानी बाहिरको उत्कृष्ट प्रयोगशालाको रुपमा यस प्रयोगशालाले काम गरिरहेको छ । विभिन्न स्वास्थ्य संस्थाका प्राविधिक जनशक्तिको सहयोग लिएर प्रयोगशाला सञ्चालनमा छ ।
भरतपुर अस्पताल विकास समितिका अध्यक्ष डा. भोजराज अधिकारीले राजधानी बाहिरको सबै दबाब थेग्न यो प्रयोगशाला सक्षम भएको बताए । अहिलेसम्म पुनः परीक्षण गर्दा फरक नआएको भन्दै उहाँले गुणस्तरमा पहिलो भएको उनले जिकिर गरे ।