पिसिआर नतिजा नआउँदै कोरोना संक्रमित डिस्चार्ज

भरतपुर, चितवन \ भरतपुर अस्पतालले शुक्रबार अन्तिम पिसिआर रिपोर्टको नतिजा नआउँदै ६ जना कोरोना संक्रमितलाई डिस्चार्ज गरेको छ । अस्पताल प्रशासनले शुक्रबार जारी गरेको सूचनामा उल्लेख गरिए अनुसार स्वास्थ्य तथा जनसंख्या मन्त्रालयको गाइड लाईन अनुसार उनीहरुलाई डिस्चार्ज गरिएको हो ।
डिस्चार्ज हुनेमा चितवनका तीन जना र नवलपुरका तीन जना रहेका छन् । चितवन भरतपुर महानगरपालिका वडा नम्बर ६ का ३ जना , नवलपुर देबचुलीका २ जना र विनयी त्रिवेणीका १ जना डिस्चार्ज भएको अस्पतालका प्रमुख मेडिकल सुपरिटेण्डेण्ट डा. श्रीराम तिवारीले जारी गरेको सूचनामा उल्लेख गरिएको छ ।
उनीहरुलाई घरमा अनिवार्य १४ दिन क्वारेण्टाईनमा बस्न, परिवारका सदस्यहरुसँग एक मिटरको दुरी कायम गर्न, मास्क प्रयोग गर्न, साबुन पानीले मिचिमिचि हात धुन र पौष्टिक आहार संतुलित रुपमा खान भनिएको छ । अस्पतालले पोजेटिभ केसको १४ दिनपछि भाईरसको प्रोटिन व्यक्तिको शरीरमा कायमै रहेर पिसिआर रिपोर्ट नेगेटिभ नआएपनि अन्य व्यक्तीलाई सर्ने संभावना अत्यन्त न्यून हुने भएकाले उनीहरुलाई डिस्चार्ज गरिएको मेडिकल सुपरिटेन्डेन्टको दावी छ ।
अस्पताल प्रशासनले विश्व स्वास्थ्य संगठन, स्वास्थ्य मन्त्रालय लगायतको रिपोर्ट र गाइडलाइनको आधारमा डिस्चार्ज गरेको उल्लेख गरेको छ ।