ब्राहमण समाजको भवन निर्माण कार्य थालनी

चितवन । ब्राहमण समाज नेपाल चितवनले भवन निर्माण कार्य सुरु गरेको छ । गत माघ १५ देखि २३ गतेसम्म भरतपुर ९ शरदपुरमा आफ्नै जमिनमा महायज्ञको आयोजना गरी महायज्ञबाट संकलित रकमले भवन निर्माण कार्यको थालनी गरेको हो । शनिबार एक कार्यक्रमका बिच महायज्ञबाट उठेको रकमको आय व्यय सार्वजनिक गर्दै भवन निर्माण कार्यको थालनी गरेको हो ।
ब्राहमण समाज र ओम कार परिवार संयुक्त रुपमा आयोजना गरेको महायज्ञमा २ करोड १६ लाख ९१ हजार ६ सय ६२ रुपैया संकलन भएको र २१ लाख ४३ हजार २ सय ८८ रुपैया खर्च भएको महायज्ञ मूल समितिका संयोजक टंकनाथ पौडेलले बताए । त्यस्तै १ करोड १४ लाख ७ हजार ८ सय ८९ रुपैया बोलकबोल उठाउन बाँकी रहेको पौडेलले जानकारी दिए । लेखा परिक्षक भोजराज न्यौपानेले आर्थिक प्रतिवेदन मुल समितिका संयोजक टंकनाथ पौडेललाई हस्तान्तरण गरेको थियो ।
वडा नं ९ शरदपुरमा ब्राह्मण समाजको नाममा रहेको २ कठ्ठा १८ धुर जमिनमा २६ सय स्क्वायर फिटमा तिन तलाको सुबिधा युत्त भवन निमार्ण गर्न थालिएको महायज्ञ मूल समितिका संयोजक पौडेलले बताए । निर्माण हुने भवनमा दिवा सत्संग तथा योग कक्षा, धार्मिक पुस्तकालय, वृद्धवृद्धा तथा दुखीका लागि आवास सञ्चालन गरिने भवन निमार्ण समितिका संयोजक ओस्तीले बताए । आफूहरुले सबै कच्चा पदार्थ निकै सस्तो मुल्यमा गुणस्तरीय कच्चा पदार्थ खरिद गर्ने र निकै बलियो आकर्षक भवन निमार्ण गर्ने ओस्तीको भनाइ छ ।
कार्यक्रममा ब्यवसायी मुकुन्द तिमिल्सेनाले ५०० बोरा सिमेन्ट निशुल्क उपलब्ध गराउने घोषणा गरेका थिए भने भट्टराईले देशभरिमै सबै भन्दा सस्तो मूल्यमा रड सिमेन्ट उपलब्ध गराउने प्रतिवद्धता जनाएको थियो ।