July 25, 2024
- ADVERTISEMENT -

‘प्लाज्मा थेरापी’बाट चितवनमा उपचार सुरु

September 4, 2020

चितवन / चितवन मेडिकल कलेजले ‘प्लाज्मा थेपारी’बाट उपचार सुरु गरेको छ । जिल्लामा पहिलो पटक कलेजले हेटौडा उपमहानगरपालिका वडा नम्बर ११ कि ५२ वर्षिया कोरोना सङ्क्रमित महिलामा प्लाज्मा थेरापी उपचार थालिएको क्षेत्रीय रक्तसंञ्चार केन्द्र भरतपुरका प्रमुख रमेशकान्त पौडेलले जानकारी दिनुभयो ।
प्रमुख पौडेलका अनुसार ती महिलालाई बिही राति दुई पोका ‘बी’ पोजेटिभ प्लाज्मा चढाइएको हो भने सोही दिन केन्द्रमा सङ्क्रमण मुक्त भएका तीन जनाले प्लाज्मा दान गरेका हुन् ।
हेटौडा र भरतपुरका पुरुषको ‘बी’ पोजेटिभ र देवघाटका पुरुषको ‘बी’ पोजेटिभ रहेको थियो । दान गरिएको रगतबाट प्लाज्मा निकालेर ती महिलालाई चढाइएको पौडेलले बताउनुभयो । उनले भने, कोभिड सङ्क्रमित भएर आईसोलेसनबाट निको भई १४ दिन कटेकाहरुको रगत संङ्कलन गरेर रक्ततत्व छुट्याइन्छ ।
निको भएकाहरूको रगतको प्लाज्मामा भाइरसविरुद्ध बनेका एन्टिबडीलाई अरू बिरामीमा प्रयोग गरिन्छ । यो विधिमार्फत कोरोना भाइरसबाट हुने मृत्युदर कम हुने चिकित्सकहरुको भनाइ छ ।
प्रमुख पौडेलले भन्नुभयो ‘प्यासिभ एन्टिबडी थेरापी भनेको एक व्यक्तिमा बनिसकेको एन्टिबडी अर्को व्यक्तिलाई दिनु हो ।’ अठार वर्ष उमेर माथिका व्यक्तिले रगतको प्लाज्मा दिन सक्छन् । कोरोना संक्रमण मुक्त व्यक्तिले दिने रगत रक्तदान नै हो ।
रगतबाट रगतमा भएको सेतो कोष हटाएर बनेको झोल पदार्थ नै प्लाज्मा भएको पौडेलको भनाइ छ । चितवन मेडिकल कलेजका अध्यक्ष एबं प्रबन्ध निर्देशक प्रा.डा हरिशचन्द्र न्यौपानेले कोभिड सघन उपचार कक्षमा एक सातादेखि उपचाररत ती महिलामा प्लाज्मा थेरापी गरेर जिल्लामा पहिलोपटक उपचार थालिएको बताउनुभयो ।
उहाँले क्रमश अन्य बिरामीहरुलाई पनि आवश्यकता र उपलव्धता अनुसार प्लाज्मा थेरापी गरिने जानकारी दिनुभयो । जिल्लामा गम्भिर रहेका धेरै सङ्क्रमितको चितवन मेडिकल कलेजमा उपचार भइरहेको उहाँले जानकारी दिनुभयो । सो मेडिकल कलेजले कोभिड प्रयोगशाला समेत सञ्चालनमा ल्याएको छ ।

- ADVERTISEMENT -