कर्मचारी संक्रमित भएपछि असोज ३० सम्म कार्यालय बन्द

धुलिखेल / कर्मचारीमा कोरोना संक्रमण पुष्टि भएपछि जिल्ला मालपोत कार्यालय, काभ्रेले आफ्नो सबै सेवा बन्द गरेको छ । कार्यालयले एक प्रेस विज्ञप्ति जारी गर्दै सबै सेवा बन्द गरेको जनाएको हो ।
कोरोना भाइरस फैलिरहेको वर्तमान अवस्थामा सेवाग्राहीको भीडभाड हुने भएकाले थप संक्रमणको जोखिम बढेको हुँदा तत्कालको लागि सबै सेवा बन्द गरिएको मालपोत कार्यालय काभ्रेको अधिकृत लोकेन्द्रबहादुर भण्डारीले बताए । भण्डारीका अनुसार कार्यालयको कर्मचारीमा कोरोना संक्रमण पुष्टि भएपछि सेवा बन्द गर्नु परेको जानकारी दिए ।
कार्यालयको अग्रपंक्तिमा खटेका कार्मचारीसँगै कोरोना संक्रमितसँगको प्रत्यक्ष सम्पर्कमा रहेका कर्मचारीहरु समेत क्वारेन्टाइनमा बस्नु पर्ने भएकाले कार्यालय सञ्चालनको लागि जनशक्ति अभाव भएकाले सेवा बन्द गरिएको मालपोत कार्यालयले जनाएको छ ।
मालपोत कार्यालय असोज ३० गतेसम्मका लागि सेवाग्राहीहरुलाई दिइने नियमित सेवा पुर्ण रुपमा बन्द गरिएको सूचनामा उल्लेख छ ।