चाडपर्व भित्रिएसँगै चितवनमा एकीकृत सुरक्षा योजना लागू : प्रजिअ

चितवन / जिल्ला प्रशासन कार्यालय चितवनद्वारा चाडपर्वलाई लक्षित गरी एकीकृत सुरक्षा योजना लागू गरिएको छ । चाडपर्वमा हुने अपराध तथा दुर्घटना न्यूनीकरणका लागि सुरक्षा योजना बनाइएको चितवनका प्रमुख जिल्ला अधिकारी नारायणप्रसाद भट्टराईले जानकारी दिए ।
प्रजिअ भट्टराईका अनुसार सुरक्षा निकायका सबै संयन्त्रलाई ‘हाइअलर्ट’ मा राखिएको छ । कोभिड–१९ को संक्रमण फैलिरहेकाले भीडभाड, मेला, जमघट हुन नदिइने उनले बताए ।
सहायक प्रमुख जिल्ला अधिकारी नेत्रप्रसाद शर्माले सूचना संकलनको संयन्त्रलाई प्रभावकारी बनाई जिल्ला प्रहरी कार्यालय चितवनको कन्ट्रोल कक्ष र जिल्ला प्रशासन कार्यालयमा रहेको आपतकालीन कार्य सञ्चालन केन्द्रमा सर्वसाधारणले गोप्य सूचना दिन सकिने बताए ।
यस्तै जिल्ला प्रहरी कार्यालय चितवनका प्रवक्ता सूर्यबहादुर थापाले जिल्लामा भित्रिने तथा बाहिरिने सवारीसाधन, शहरी तथा ग्रामीण क्षेत्रका सडक आसपास क्षेत्रमा गस्ती पेट्रोलिङ बढाइने बताए । उनका अनुसार थप प्रभावकारीका लागि सादा पोशाकमा खटिने प्रहरी संख्या बढाइने छ ।
चोरी, लुटपाट, जुवातास खेल्ने जस्ता गतिविधि नियन्त्रण गर्न प्रहरीका सबै इकाई परिचालन हुने उनको भनाइ छ । हाइवे क्षेत्रका सवारीमा निगरानी, पुजापाठ हुने क्षेत्रमा भीडभाड हुन नदिने, मेला, जमघट हुन नदिन निगरानी बढाउन सुरु भएको उनले भने । होटल, रेष्टुरेण्ट राति अबेरसम्म खोल्न, समूह बनाएर हिँडडुल गर्न नदिइने जनाइएको छ ।