गरिब तथा विपन्न वर्गका लागि राहत बन्दै कपडा बैंक

–अशोक भाई लामा
मकवानपुर / पश्चिम मकवानपुरको मनहरी गाउँपालिकाको मनहरी बजारमा कपडा बैंकको स्थापना गरिएको छ । मनहरी गाउँपालिका–७ का स्थानीय बासिन्दा सागर लामाको सक्रियतामा केही दिन यताबाट कपडा बैंक सञ्चालनमा ल्याइएको हो ।
कोरोना महामारी तथा नियन्त्रणको लागि गरिएको लकडाउन तथा निषेधाज्ञाबाट आर्थिक समस्यामा परेका वर्ग तथा समुदायलाई लक्षित गरी ‘मनहरी सेवा समाज परिवार’ र ‘यूएफसी मनहरिद्वारा कपडा बैंक सञ्चालनमा ल्याइएको हो ।
कपडा बैंकले दिन दुःखीका लागि निःशुल्क रुपमा कपडा उपलब्ध गराउँदै आएको छ । असहाय तथा विपन्न गरीबलाई सहयोग पु¥याउने उद्देश्यले खेर गइरहेको कपडा प्रयोगमा ल्याउने गरी सो कपडा बैंक स्थापना गरिएको सञ्चालक लामा बताउँछन् ।
उनका अनुसार केही स्थानीय युवाहरु तथा सामाजिक संस्थाको पहलमा विपन्न वर्गलाई लक्षित गरी कपडा बैंक स्थापना गरिएको हो । आर्थिक अवस्था कमजोर भएका व्यक्ति तथा परिवारले आफूलाई चाहिएको कपडा छानाछानी पैसा नतिरी लैजान सक्ने व्यवस्था कपडा बैंकले गरिदिएको लामाले बताए । बैंकबाट गरिब तथा अति विपन्न परिवारलाई राहत पुग्ने सञ्चालक लामाको भनाइ छ ।
पुराना कपडा सँगै जुत्ता, भाँडाकुँडा समेत कहाँ राख्ने, कसलाई दिने, के गर्ने भनेर चिन्तामा हुनुहुन्छ भने ती सामान आफूहरुलाई कपडा बैंकमा ल्याएर सहयोग गर्नुहुन पनि उनले अनुरोध गरेका छन् ।
‘कपडा बैंकले असहाय, असक्त तथा आर्थिक अवस्था न्यून भएका व्यक्तिहरुलाई मौसम अनुसार कपडा उपलब्ध गराउन मद्दत पुु¥याउने विश्वास लिएको छु,’ उनले भने, ‘प्रयोग गर्न मिल्ने कपडा सङ्कलनमा सहयोग गर्न सबैमा आग्रह गर्दछु ।’