चितवनमा चोरी बढ्दै, चार महिनामा ३९ पक्राउ

चितवन / चितवनमा पछिल्लो समय दिनहुँ चोरीका घटना बढ्दै गएको प्रहरीले जनाएको छ । पछिल्लो समय कोरोना कहरका कारण धेरैको रोजगारी गुमेको र विभिन्न कारणले चोरीका घटना बढेको हुन सक्ने प्रहरीको अनुमान छ ।
प्रहरीका अनुसार चालु आ व २०७७÷७८ को चार महिनामा मात्रै विभिन्न २७ वटा चोरीका घटना दर्ता भएका छन् । सोही आधारमा चोरीमा संलग्न ३९ जना व्यक्तिलाई पक्राउ समेत गरिसकेको बताएका छन् ।
पक्राउ पर्नेहरुमा ३८ जना पुरुष र एक जना महिला रहेका छन् । जसमध्ये प्रहरीले मोटरसाइकल चोरी मुद्दामा मात्रै ११ जनाविरुद्ध मुद्दा चलाएको छ भने नगद धनमाल तथा गरगहना चोरीका मुद्दामा १६ जनाविरुद्ध मुद्दा चलाइएको जानकारी दिएको छ । आव २०७६÷७७ मा जम्मा ५८ वटा मात्रै चोरी मुद्दा दायर गरेको थियो ।
जिल्ला प्रहरी कार्यालय चितवनका प्रमुख प्रहरी उपरिक्षक नान्तीराज गुरुङले रातिको समयमा भन्दा दिउँसोको समयमा नै बढी चोरी हुने गरेको बताएका छन् । दिउँसो घरमा कोही नभएको अवस्था पारेर धेरै चोरी हुने गरेको उनले भने ।
उनका अनुसार दिनदहाडै चोरीका घटना बढ्दै जाँदा सिँगो जिल्लामा नै सुरक्षा चुनौति थपिदै गएको हो । चोरीका घटना हुने क्षेत्रमा निगरानी बढाउने, टोल टोलमा सचेतना जगाउने लगायतका कामहरु समेत निरन्तर गरिरहेको उनको भनाइ छ ।