प्रधानमन्त्री र चिनियाँ उपमन्त्रीको आइतबार राति नै भेटवार्ता

काठमाडौं / नेपाल भ्रमणमा रहेका चिनियाँ कम्युनिस्ट पार्टीका अन्तर्राष्ट्रिय विभागका उपमन्त्री कुओ येचाओको टोलीले आइतवार राति बालुवाटारमा प्रधानमन्त्री केपी शर्मा ओलीसँग भेट गरेका छन् । सोमवारका लागि भेट तय भएको बताइए पनि चिनियाँ टोलीले प्रधानमन्त्री ओलीलाई आइतवार राति नै भेट गरेको प्रधानमन्त्रीका परराष्ट्र मामिला सल्लाहकार राजन भट्टराईले जनाएका छन् ।
सामाजिक सञ्जाल ट्वीटरमा भट्टराईले उक्त भेटको पुष्टि गरेका हुन् । दुई घण्टाको भेटमा के कुरा भयो, त्यसबारे केही खुलाइएको छैन । नेपाल भ्रमणमा रहेको चिनियाँ कम्युनिस्ट पार्टीको प्रतिनिधिमण्डलले काठमाडौँ उत्रिएसँगै राजनीतिक भेटघाट सुरु गरेको थियो । आइतबार कम्युनिस्ट पार्टीका अन्तर्राष्ट्रिय विभागका उपमन्त्री येचाओको नेतृत्वमा काठमाडौं उत्रेको प्रतिनिधिमण्डल राष्ट्रपति विद्यादेवी भण्डारीसँग भेटवार्ता गरिसकेका छन् ।
प्रतिनिधिमण्डलले आइतबार साँझ नै राष्ट्रपति भण्डारीसँग शीतल निवासमा भेटवार्ता गरेको हो । चिनियाँ टोलीले भेटमा राष्ट्रपति भण्डारीलाई चिनियाँ समकक्षीको सन्देशबारे जानकारी गराएको स्रोत बताउँछ । यद्यपि भेटवार्ताका क्रममा भएका छलफलबारे औपचारिक रुपमा दुवै निकायबाट जानकारी भएको छैन ।
पुस ५ गते हठात भएको प्रतिनिधिसभा विघटनपछि आन्तरिक राजनीतिक तरंगित छ । कानुनी रुपमा बाहेक पार्टी विभाजन भइसकेको अवस्थामा उत्तरी छिमेकबाट राजनीतिक भ्रमण भएको हो ।
प्रतिनिधिमण्डलले नेपाल कम्युनिस्ट पार्टीका शीर्ष नेताहरुसँग पनि सोमबार नै भेट गर्नेछन् । नेकपा अध्यक्ष पुष्पकमल दाहालसँग सोमबार खुमलटारमा भेटको कार्यक्रम रहेको स्रोत बताउँछ । यस्तै, नेता माधवकुमार नेपालसँग पनि निवास कोटेश्वरमा नै भेट हुनेछ । वरिष्ठ नेता झलनाथ खनाल, नेपाली कांग्रेसका सभापति शेरबहादुर देउवालाई पनि चिनियाँ टोलीले भेट गर्ने सम्भावना रहेको स्रोत बताउँछ ।