भोलिदेखि उपत्यकामा चलचित्र भवन सञ्चालन गर्न पाइने

काठमाडौं / काठमाडौं उपत्यकाका चलचित्र भवन भोलि बिहीबारदेखि सञ्चालन गर्न दिइने भएको छ । काठमाडौं, भक्तपुर र ललितपुरका सीडीओहरुको आज बुधबार बसेको बैठकले कोभिड प्रोटोकल पालना गर्दै चलचित्र भवन खुलाउन अनुमति दिने निर्णय गरेको हो ।
काठमाडौं उपत्यका प्रमुख जिल्ला अधिकारी कालिप्रसाद पराजुलीले स्वास्थ्य मापदण्ड पालना गर्दै चलचित्र भवन खुलाउन अनुमति दिइएको बताए । स्मार्ट लकडाउनको कार्यविधिअनुसार चलचित्र भवन खुलाउन अनुमति दिएको उनले भने ।
चलचित्र भवनले प्रशासनको आदेशको पालना भए नभएको अनुगमन गर्ने समेत निर्णय भएको उनले जनाए । सीडीओको बैठकले जारी निषेधाज्ञालाई भदौ मसान्तसम्म थप्ने निर्णय पनि गरेको छ । प्रशासनले निर्णय गरे पनि चलचित्र भवनहरु तत्काल खुल्ने अवस्था नरहेको हल सञ्चालकहरुको भनाइ छ ।