स्थानीय चुनाव : नेपाली कांग्रेस नवलपुर ५२ वडा सभापतिको संयुक्त बैठक

गैंडाकोट / नेपाली कांग्रेस नवलपुर ५२ वडाका सभापतिहरुको संयुक्त वैठक सम्पन्न भएको छ । नेपाली कांग्रेस क्षेत्रीय समिति नवलपुर क्षेत्र नं. १ को आयोजनामा उक्त संयुक्त वैठक सम्पन्न भएको हो ।
सरकारद्वारा घोषित आगामी बैशाख ३० गते हुने स्थानीय चुनावका लागि नेपाली कांग्रेस नवलपुर क्षेत्र नं. १ ले सम्पूर्ण वडाका सभापतिहरुसँग निर्वाचन केन्द्रित छलछफल गरेको हो ।
नेपाली कांग्रेस नवलपुरका क्षेत्रीय सभापति अमृत भट्टचनले आसन्न स्थानीय निर्वाचनको लागि तिब्र गतिमा तयारी गर्न सम्पूर्ण वडा सभापतिहरुलाई निर्देशन दिएका छन् । उनले आफ्नो टोल र वडामा विपक्षीले छरेका भ्रमलाई चिर्दै संगठन निर्माणमा विशेष ध्यान दिनु पर्ने बेला आएको बताए । गरिब, उत्पीडन र निमुखा वर्गको हकहितमा आवाज उठाउन जोड दिनु पर्ने उनको भनाइ थियो ।
उनले आगामी हुने स्थानीय निर्वाचनका लागि नवलपुरका सम्पूर्ण वडा, गाउँपालिका, नगरपालिका, प्रदेश र संघीयमा नेपाली कांग्रेसलाई विजयी बनाउन अहोरात्र खट्न निर्देशन दिएका छन् ।
कार्यक्रममा पूर्व सांसद महेन्द्रध्वज जिन्सी, युवा नेता खेमराज सापकोटा, युवा नेता एवम वडा सदस्य प्रकाश सापकोटाको विशेष उपस्थिति रहेको थियो । कार्यक्रम नेपाली कांग्रेस नवलपुर क्षेत्र नं. १ का सभापति अमृत भट्टचनको अध्यक्षतामा सम्पन्न भएको थियो भने सञ्चालन क्षेत्रीय सचिव अमृत श्रेष्ठले गरेका थिए ।