तीजलाई भड्किलो नगर्न प्रशासनको आग्रह

चितवन / जिल्ला प्रशासन कार्यालय चितवनले तीजमा भड्किलो र खर्चिलो कार्यक्रम नगर्न आग्रह गरेको छ । प्रमुख जिल्ला अधिकारी अस्मान तामाङले आज (बिहीबार) एक सूचना जारी गर्दै तीज मनाउने नाममा भड्किलो र खर्चिलो कार्यक्रम नगर्न आग्रह गरेका हुन् ।
प्रशासनले परम्परा र सामाजिक रितीरिवाजलाई निरन्तरता दिने तथा संवर्द्धन गर्ने गरी तीज मनाउन आग्रह गरेको छ । सुसंस्कार कायम गर्ने कार्यमा राजनीतिक दल, नागरिक समाज, पेशागत संघ–संस्थाहरु, सञ्चारकर्मी, महिला सञ्जाल तथा सम्पूर्ण जिल्लाबासीहरुबाट सहयोगको अपेक्षा रहेको सूचनामा भनिएको छ ।
कसैले तामझाम, तडकभडक र खर्चिलो हुने गरी तीज कार्यक्रम गरे गराएमा कारबाही हुने प्रशासनको चेतावनी छ । प्रशासनले पछिल्लो समय भड्किलो र खर्चिलो कार्यक्रममा कमी आएको पनि जनाएको छ ।