चितवनका पत्रकार सिंजालीलाई उपचारको लागि आर्थिक सहयोग प्राप्त

रत्ननगर / चितवन राप्तीका अग्रज पत्रकार विरबहादुर सिंजालीलाई उपचारको लागि आर्थिक सहयोग प्राप्त भएको छ । पूर्वी चितवन पत्रकार मञ्चले सिंजालीको उपचारका लागि २० हजार रुपैया आर्थिक सहयोग गरेको हो । सिंजालीको घरमै पुगेर उक्त रकम हस्तान्तरण गरिएको हो ।
मञ्चका अध्यक्ष होमनाथ सापकोटा, निर्वतमान अध्यक्ष रवि भट्ट, पत्रकार महासंघ चितवनका कोषाध्यक्ष तथा मञ्चका उपाध्यक्ष राजेन्द्र आचार्यले संयुक्त रुपमा रकम हस्तान्तरण गरेका थिए ।
सिंजाली विगत लामो समयदेखि मधुमेह (सुगर)ले ग्रसित घरमै उपचाररत छन् । उपचार र औषधि खरिदमा आर्थिक अभाव भएपछि पूर्व उपाध्यक्ष समेत रहेका सिंजालीलाई आर्थिक सहयोग गरिएको अध्यक्ष सापकोटाले बताए ।
२०५५ सालदेखि पत्रकारिता सुर गरेका सिंजाली २०५८ सालमा पत्रकार महासंघको सदस्य बनेका थिए । ग्रामिण क्षेत्रका मुद्दाहरुलाई सञ्चार माध्यमद्धारा राज्यको ध्यानाकर्षण गराउन सिंजालीले खेलेको भूमिका अहम रहेको छ ।
मञ्चका अध्यक्ष सापकोटाले लामो समय पत्रकारितामा योगदान गरेका पत्रकारहरुलाई भत्ता दिने विषयमा राज्यले तोकेको उमेरहद अस्वभाविक रहेको बताए । उनले निरन्तर २० वर्ष काम गरेका पत्रकारहरुलाई कार्यअवधिका आधारमा भत्ताको व्यवस्था गर्न माग गरे ।
पत्रकार महासंघका कोषाध्यक्ष तथा मञ्चका उपाध्यक्ष आचार्यले स्थानीय तहको समन्वयमा पत्रकारहरुलाई औषधि उपचार खर्चको व्यवस्था गर्ने गरी पहलकदमी भइरहेको बताए ।
अग्रज पत्रकार सिंजालीले पेशाबाट अवकास लिएपछि रोग र भोकको अवस्था र्सिजना भएको बताए । मञ्चका सचिव ध्रुवराज खनालले सञ्चालन गरेको कार्यक्रममा सहसचिव विकास पौडेल, पत्रकारहरु निराजन घिमिरे, रामेश्वर रिजाल, विशाल आले, सन्तोष बस्ताकोटी, ध्रुव लामिछाने, मनिष अधिकारी, कमल ढकाल लगायतको सहभागिता रहेको थियो ।