तीन वर्षपछि खुल्यो चीनको सिमाना

काठमाडौं / कोभिड–१९ का कारण बन्द चीनको सिमाना करिब ३ वर्षपछि खुलेको छ । चीनले अन्तर्राष्ट्रिय आगन्तुकहरूका लागि आफ्नो सिमाना करिब ३ वर्षपछि आइतबारबाट खुला गरेको हो ।
चीनमा कोरोनाभाइरस सङ्क्रमण दर बढिरहेको स्थितिमा पनि कोभिड नीतिमा महत्त्वपूर्ण परिवर्तन गर्दै खुला गरेको हो । चीनले सन् २०२० को मार्च महिनामा सीमामा प्रतिबन्ध लगाएको थियो ।
यद्यपि, उनीहरूले यात्रा गर्नुअघि ४८ घण्टाभित्र गरिएको पीसीआर परीक्षणको नतिजा नेगेटिभ आएको प्रमाण साथमा बोक्नुपर्ने हुन्छ ।
सरकारको यो कदमलाई अधिकांशले परिवारसँग पुनर्मिलनको अवसरका रूपमा स्वागत गरेका छन् ।
चन्द्र नयाँ वर्ष ‘चुन युन’ को सुरूवातसँगै चीनले देश पुनः खुला गरेको हो । महामारी अघि यस समय अधिकांश मानिसहरू आफ्नो परिवारसँग समय बिताउन विश्वभरबाट चीनस्थित घर फर्कन्थे ।
हङकङबाट मात्रै ४ लाख मानिसहरू आगामी साताहरूमा मुख्य भूमि चीनमा यात्रा गर्ने अपेक्षा गरिएको छ । बेइजिङ र सियामेनलगायत सहरहरूतर्फ उडान भर्नका लागि मानिसको लामा लाइनहरू हुने ठानिएको छ ।
यस चिनियाँ नयाँ वर्षमा दुई अर्ब मानिसहरूले चीन भ्रमण गर्ने अपेक्षा गरिएको छ । उक्त संख्या गत वर्ष यात्रा गर्नेहरूको संख्याभन्दा दोब्बर हो ।
विगत तीन वर्षमा चीनले विश्वको सबैभन्दा कडा कोभिड स्वास्थ्य नीतिहरू अपनायो । जसअन्तर्गत कयौँ लकडाउन, पटकपटक कोभिड परीक्षणको आवश्यकतालगायत नियम थिए जसले देशको अर्थतन्त्रमा उल्लेख्य प्रभाव पारेको थियो ।
चीनले आफ्नो कोभिड शून्य नीतिका मुख्य कडा प्रतिबन्धहरू खुकुलो बनाएदेखि त्यहाँ अस्पताल र शव दाह गृहहरूमा चाप बढेको विवरणहरू सार्वजनिक भएका छन् । तर, राज्यले त्यहाँको सङ्क्रमण दर सार्वजनिक गर्नबाट रोक लगाएको छ । शनिवार त्यहाँ जम्मा दुई जनाको मृत्यु भएको जनाइएको छ ।
शनिवार नै चिनियाँ सरकारले सङ्क्रमण दरबारे आलोचना गर्ने एक हजारभन्दा बढी सामाजिक सञ्जालका खाताहरूमा प्रतिबन्ध लगाएको थियो ।
सङ्क्रमण दरको अपेक्षित वृद्धि र त्यहाँका मानिसको चीन बाहिर यात्राले युरोपेली मुलुक, अमेरिका, भारत लगायत धेरै देशहरूलाई चीनबाट भित्रने मानिसहरूमा कोभिड–१९ परीक्षणको नेगेटिभ रिपोर्ट अनिवार्य गर्न प्रेरित गरेको छ । -एजेन्सी