खिचरा महोत्सवमा आज शिव परियार र अनु चौधरीको प्रस्तुति

खैरहनी / खैरहनी ५, गौचरनमा जारी आठौँ खिचरा महोत्सवको सांस्कृतिक कार्यक्रमअन्तर्गत आज (सोमबार) चर्चित गायक शिव परियार र गायिका अनु चौधरीको प्रस्तुति रहने छन् । आज विशेषगरी गायक परियार र गायिका चौधरीसँगै स्थानीय कलाकारहरूको सांगीतिक प्रस्तुति रहने आयोजकले जनाएको छ ।
महोत्सवको चौथो दिन आज सांगीतिक क्षेत्रमा ख्याति कमाएका शिव परियार र अनु चौधरी मुख्य आकर्षणको रूपमा रहने सूचना तथा समाचार सम्प्रेषण समितिका संयोजक दीपेश चौधरीले जानकारी दिए । पुस २८ देखि सुरू भएको महोत्सवमा हरेक दिन विविध सांस्कृतिक कार्यक्रम हुँदै आएको छ ।
संयोजक चौधरीका अनुसार थारू कलाकारहरू फिलीप चौधरी, रूविना चौधरी तथा स्तब्ध व्याण्डका कलाकारहरूले प्रस्तुति दिनेछन् । रत्ननगर कला मन्दिर र थारू सांस्कृतिक नृत्य तथा विभिन्न आदिवासी जनजाति समुदायको नृत्यसमेत महोत्सवमा प्रस्तुत गरिने उनले बताए । माघ ४ गतेसम्म सञ्चालन हुने महोत्सव अवधिभर नै सांस्कृतिक कार्यक्रम जारी रहने उनले बताए ।
महोत्सवमा विभिन्न खेलकुद प्रतियोगिता समेत सञ्चालन हुँदै आएको छ भने कृषि प्रदर्शनीले पनि महोत्सवमा स्थान पाएको छ । करिब १५० व्यावसायिक स्टल रहेको महोत्सवमा थारू पहिचान झल्काउने प्रयास गरिएको छ ।