राष्ट्रपति निर्वाचनमा रास्वपा सहभागी हुने, राप्रपा नहुने

काठमाडौँ / राष्ट्रपति निर्वाचनबारे निर्णय लिन राष्ट्रिय स्वतन्त्र पार्टीले पदाधिकारी र संसदीय दलको बैठक बोलाएको छ । पार्टीको आज (बिहीबार) बस्ने बैठकले राष्ट्रपति निर्वाचनमा कसलाई भोट हाल्ने भनेर निक्र्यौल गर्ने रास्वपाले जनाएको छ । प्रतिनिधि सभामा रास्वपाका १९ जना सांसद रहेका छन् ।
आज बिहान १० बजेदेखि ३ बजेसम्म राष्ट्रपति पदको निर्वाचन हुँदैछ । राष्ट्रपति पदका लागि नेपाली कांग्रेसका नेता रामचन्द्र पौडेल र नेकपा एमालेका उपाध्यक्ष सुवास नेम्वाङ उम्मेदवार छन् ।
नेपाली कांग्रेससहित, नेकपा माओवादी केन्द्र, एकीकृत समाजवादी, जसपा, लोसपा, नागरिक उन्मुक्ति पार्टी, जनमत पार्टी र राष्ट्रिय जनमोर्चा पौडेलको पक्षमा खुलेका छन् ।
त्यस्तै राष्ट्रिय प्रजातन्त्र पार्टी भने राष्ट्रपति निर्वाचनमा सहभागी नहुने भएको छ ।
हिजो बसेको केन्द्रीय कार्यसम्पादन समितिको बैठकले राष्ट्रपति निर्वाचनमा मतदानमा सहभागी नहुने निर्णय गरेको प्रवक्ता मोहन श्रेष्ठले जानकारी दिएका छन् ।