चितवनमा महावीर पुनको समर्थन, युवाद्वारा प्रमको ध्यानाकर्षण

चितवन / राष्ट्रिय आविष्कार केन्द्रका संस्थापक महावीर पुनको आन्दोलनलाई समर्थन गर्दै चितवनका युवाहरुले प्रधानमन्त्री पुष्पकमल दाहाल ‘प्रचण्ड’ को ध्यानकार्षण गराएका छन् । भरतपुरको चौविसकोठीमा प्रधानमन्त्री दाहालको सवारीकै बेला युवाहरुले आइतबार दिउँसो शान्तिपूर्ण प्रर्दशन गरी ध्यानाकर्षण गराएका हुन् ।
राज्यले अनुसन्धान, नवप्रवर्तन र आविष्कारको क्षेत्रलाई प्राथमिकता नदिएको भन्दै सरकारको ध्यानकर्षण गराएका पुनको समर्थनमा चितवनका युवाहरुको पनि समर्थन रहेको भन्दै प्रधानमन्त्रीको ध्यानकर्षण गराएको युवा सनिल मरेटाले बताए ।
नवलपरासीको गैँडाकोटमा स्थानीयवासीको साझेदारीमा आइएमई समूहले निर्माण गरेको मौलाकालिका केबलकारको सोमबार उद्घाटन कार्यक्रममा सहभागी हुन जहाजबाट चितवन आएका प्रधानमन्त्री दाहाललाई विमानस्थल नजिकै चौविसकोठीमा युवाहरुले अनुसन्धान, नवप्रवर्तन र आविष्कारको नीति पारित गर्न भन्दै विभिन्न नारा लेखिएका प्लेकार्ड र ब्यानर प्रदर्शन गरी ध्यानाकर्षण गराएका थिए ।
पुनले अनुसन्धान, नवप्रवर्तन र आविष्कार गर्ने प्रतिभाशाली र सिर्जनशील नेपालीलाई अनुसन्धान गर्ने काममा ठोस सहयोग गर्न हरेक वर्ष संघीय र प्रदेश सरकारले आफ्नो विकास बजेटको १ प्रतिशत रकम छुट्याउनुपर्ने र ‘अनुसन्धान, नवप्रवर्तन र आविष्कार कोष’ मा राख्न माग गरेका छन् । सरकारले २०७६ सालमा ल्याएको विज्ञान, प्रविधि तथा नवप्रवर्तन नीतिमा पनि कोष स्थापना गर्ने परिकल्पना गरिएको छ । १ अर्ब रुपैयाँ राखेर नवप्रवर्तन कोष सञ्चालन गरिने नीतिमा उल्लेख छ ।
तर हालसम्म पनि उक्त विषयका बारेमा सरकारले चासो देखाएको छैन । पुनले केही दिनअघि ४ बुँदे माग राख्दै प्रधानमन्त्री पुष्पकमल दाहाल, योजना आयोगका उपाध्यक्ष मीनबहादुर श्रेष्ठ, शिक्षा विज्ञान तथा प्रविधिमन्त्री अशोक राई, अर्थमन्त्री प्रकाशशरण महत र गृहमन्त्री नारायणकाजी श्रेष्ठलाई ध्यानाकर्षण गराएका थिए ।