चितवनमा आजदेखि ‘तामाङ भाषा प्रशिक्षण’ सुरु

–सन्तोष तामाङ
चितवन । तामाङ समुदायको संस्कृति तथा भाषा जगेर्नाका लागि एक हप्ते ‘तामाङ भाषा प्रशिक्षण’ हुने भएको छ । आज (शनिबार) देखि उक्त तालिम सुरु हुन लागेको तामाङ पत्रकार संघ जिल्ला शाखा चितवनका अध्यक्ष बबिलाल तामाङले जानकारी दिए ।
अध्यक्ष तामाङका अनुसार जिल्ला समन्वय समिति चितवनको सभा हलमा ‘तामाङ भाषा प्रशिक्षण’ हुने भएको हो । तालिम जेठ २७ गतेबाट असार १ गतेसम्म सञ्चालन हुनेछ ।
तालिममा पार्वतीपुर, मंगलपुर, गौरीगंज, किरणगंज, भोजाड, लामाटोल, भण्डारा, बाह्रघरे, लोथरलगायत सबै स्थानका प्रशिक्षार्थी सहभागी हुने उनले बताए ।
चितवनमा नै पहिलो पटक हुन लागेको ‘तामाङ भाषा प्रशिक्षण’ मा तामाङ समुदाय लाभान्वित हुने विश्वास गरिएको छ । तालिममा ७ वर्षका बालिकादेखि वृद्ध र अन्य जातिहरुको पनि सहभागी हुने भएको छ ।
पछिल्लो पुस्ताका अधिकांश तामाङहरु भाषाबाट बञ्चित भएकै कारण संघले यो अभियान थालेको अध्यक्ष तामाङको भनाइ छ । तामाङ भाषा प्रचलनमा नआउनु, बढ्दो शहरीकरणसँगै युवायुवती अन्य भाषा सिक्न बाध्य हुनु यसको मुख्य कारण बताइएको छ ।
संघले तालिममा भरतपुर महानगरभित्रका सम्पूर्ण तामाङवासीहरुलाई तालिममा सहभागी हुन विभिन्न संचार माध्यम मार्फत आग्रह समेत गरेको छ । तालिममा सहभागिताका लागि भरतपुर १६ का अधिकांश घरघरमा आग्रह गर्दै हिँडेको अध्यक्ष तामाङले बताए ।
भरतपुर महानगरपालिका उपमेयर चित्रसेन अधिकारीले तालिमको उद्घाटन गर्ने कार्यक्रम रहेको छ । तालिमको प्रशिक्षण अधिवक्ता अजयकुमार तामाङ दिने तय भएको छ ।