चलचित्र ‘बगान’ प्रदर्शनमा, एकल महिलालाई निःशुल्क

चितवन / एकल महिलालाई लक्षित गरी निर्माण गरिएको नेपाली चलचित्र ‘बगान’ आज (शुक्रबार) बाट देशैभर प्रदर्शन गरिँदै छ । असार २९ गते प्रदर्शन मिति तोकिएको चलचित्र ‘बगान’को गत शनिबार पत्रकार सम्मेलन गरिएको थियो ।
चार दशक बढी चलचित्र क्षेत्रमा योगदान प्रदान गरेका निर्देशक सरोज खनालले एकल महिलाले चलचित्र ‘बगान’ निःशुल्क हेर्न पाउने बताएका छन् । चलचित्र हेर्न एकल महिलाले आफ्नो परिचय खुल्ने प्रमाण साथमा ल्याउन अनुरोध गरिएको छ ।
सय बढी चलचित्रमा नायकको अभिनय गरी सकेका खनाल पहिलो पटक निर्देशक भई ‘बगान’ चलचित्र प्रदर्शनमा आएको हो । चलचित्रले हरेक घरका महिलाको दुःख, समस्या र त्यसको समाधानसहितको कथा बोकेको निर्माण पक्षले दावी गरेको छ ।
अभिनेत्री करिश्मा मानन्धरले ‘बगान’ले फिल्म क्षेत्रमा क्रान्ति गरेको बताइन् । सन्देशमूलक चलचित्र बनेकोले हलसम्म आएर हेरिदिन उनले आग्रह गरिन् ।
निर्देशक सरोज खनाल र चलचित्रमा एकल महिलाको भूमिकामा देखिएकी करिश्मा मानन्धरसँग जोडिएर काम गर्न पाउँदा धेरै सिक्ने अवसर मिलेको नवकलाकार प्रमिला कार्कीले बताइन् । आफू विश्वविद्यालयमा नै प्रवेश गरेको अनुभव गरेको उनको भनाइ छ ।
सुरेश वाग्लेको निर्माणमा बनेको फिल्ममा निर्देशक खनाल, करिश्मा मानन्धर, आकाश श्रेष्ठ, नीर शाह, बसुन्धरा भुसाललगायतका कलाकारको अभिनय रहेको छ ।